A DPH presenta un presupuesto “municipalista y social” ta 2013

L'Executivo provincial uescano ha asegurau que ye posible tirar ta debant con unas cuentas en as que se mantengan totz os aportes socials. De feito, presumen de tener entre as mans un prochecto de presupuestos que creixerá un 2% o venient anyo

A Diputación Provincial de Uesca (DPH) ha dau a conoixer o suyo prochecto de presupuestos t’o venient anyo 2013, que ha definiu como “municipalista y social” con unas cifras pensadas ta guaranciar o compromís con os concellos, con a inversión publica, y a protección social. Tres pilars alazetals que han recordau dende a institución uescana antes de levar o documento a os tramites d’aprebación final.

Atro d’os prencipals datos que caracterizan as cuentas ta 2013 ye que “se mantiene a capacidat inversora d’a Diputación gracias a la mayor aportación de fondos propios, que supera o 78%”, sinyalan dende a DPH en un comunicau. Mas d’a metat d’o gasto d’a Diputación (52,78%) se diriche a inversions, tanto a las directas realizadas por a propia Diputación (38,32%) como a las que realizan os concellos y entidatz con l’aduya d’as transferencias d’a Diputación, mientres se contiene o gasto corrient con una rebaixa d’o 1%.

A o prochecto de presupuestos ta 2013 se bi incorpora amás, por primer vegada, o Plan de Concertación Economica que a DPH ha encetau en os zaguers anyos como mida extraordinaria de refirme a os municipios de Uesca. T’o venient anyo, a partida será dotada de 2,4 millons d’euros ta fer frent a os gastos ordinarios. A dita partida se debe adhibir o paquet d’abances ta concellos, dotau en iste caso de dos millons.

Lourdes Arruebo, vicepresidenta segunda d’a Diputación y responsable de Ficienda, ha sinyalau o prochecto como una muestra mas de que ye posible tirar ta debant con unas cuentas socials sin haber de recurrir a retalles. Ha meso l’accento en as politicas socials con unas partidas “que se mantienen intactas” igual que en os zaguers exercicios,  se materializan por eixemplo en o programa de teleasistencia y en as aduyas a entidatz socials “porque entendemos que si en momentos millors os colectivos mas desfavoreixius contaban con o nuestro refirme, en a situación actual ni muito menos los imos a deixar de costau, y ells saben que pueden contar con ista Institución”, ha explicau.

Por o que fa a o capitol d’ingresos, proceden practicament en a suya totalidat (90%) de l’aportación en a participación d’os ingresos de l’Estau y d’o que se denomina premio de cobranza, ya que os convenios que se manteneban con l’administración central y l’Executivo autonomico s’han reduciu en 6 millons d’euros.

Fuent: http://www.aragon2.com/n-20495-503-DPH_presenta_Presupuesto_municipalista_social_para_2013

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.