A economia espanyola en caida libre: Puyan l’ature y a prima de risque, baixa a calificación

En Aragón a taixa de paro ye d'o 18,38% y son 119.300 as presonas sin triballo en o país

O president d'o gubierno espanyol en o Congreso. Foto: A Moncloa

O president d'o gubierno espanyol en o Congreso. Foto: A Moncloa

A enquüesta de población activa que publica l’INE deixa un nuevo record de poblacion sin triballo en Espanya. La taixa d’ature plega ta o 24,44% y afecta a 5.639.500 presonas en Espanya. Unatro dato que refleixa la enqüesta: 1.728.400 fogars tienen a totz os suyos miembros en l’ature. En Aragón, 9.900 presonas más s’han trobau con l’ature mientres o primer trimestre d’iste anyo, y o numero total de desemplegaus ye de 119.300, con una taixa d’ature d’o 18,38%.

Os datos ya son por dencima d’as previsions d’o gubierno espanyol ta iste anyo 2012, que yera d’un 24,3%. Bells estudeos privaus y os datos europeyos creyen que a taixa continará puyando, encara que o gubierno de Mariano Rajoy creye que a la fin d’iste anyo prencipiará a reactivar-se un mercau laboral que no ha sentiu encara en positivo a reforma laboral.

Pero no ye l’unico dato economico negativo que s’ha conoixiu ista semana. L’achencia de calificación Standard and Poors ha tornau a rebaixar a nota d’a economía espanyola en dos escalerons dende A/A-1 dica BBB+/A-2 en entender que existen “risques importants respective a o creiximiento economico y a la execución presupuestaria”, bella cosa que podría repercutir negativament en a calidat crediticia d’Espanya.

De feito, en conoixer-se iste dato, a prima de risque espanyola, ye dicir, a esferencia con os bonos de deuda alemans, ha tornau a puyar y ya pasa d’os 430 puntos.

Puya tamién l’IPC

L’endiz de Pres de Consumo (IPC) puyó una decima a suya taixa anual en abril, dica o 2%, seguntes l’indicador abanzau sobre a evolución de pres en Espanya publicau iste viernes por l’Instituto Nacional d’Estatistica espanyol. D’ista forma, os pres tornan a repuntar en o quatreno mes de l’anyo, dimpués d’haber baixau una decima, dica l’1,9% o mes anterior, y situgar-se en o suyo ran mas baixo dende agosto de 2010.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.