A economía solidaria presienta as suyas alternativas en unas chornadas en Zaragoza

REAS Aragón organiza as XVIII chornadas d'economía solidaria

cartel_JORNADAS_2013Con 18 edicions, as Chornadas d’Economía Solidaria que organiza todas las anyadas REAS Aragón (Rete d’Economía Alternativa y Solidaria) han esdeveniu una calendata sinyalada ta totz os intresaus en modelos alternativos d’economía.

O lema esleixiu ta ista edición ye “¿Encara creyes que no bi ha alternativas?“, que enamplan concretando alternativas economicas, transformaderas, y mesmo a ran personal. Un convite, seguntes a organización, “a reflexionar, a continar construyindo as alternativas que ya existen, a continar soniando modelos socioeconomicos posibles basau en a democracia directa y o desembolique comunitario y a continar fendo chestos individuals y accions colectivas”, entre atras cosas.

As chornadas prenciparán o 3 de chunio con a charrada “Economía, mullers y chenero. Politicas feministas ta cambiar o modelo“. O martes continará con “As personas antis que no a suya deuda: ¡O chugo se puet crebar!” y o miercols “D’a renta minima d’inserción t’a renta basica d’as iguals“. O chueves bi habrá un teatro – forum titulau “Los Rodriguez: una familia en crisi“, con a tematica d’a crisi global. Totz istos actos se ferán dende as 20 horas en o Centro Joaquín Roncal d’a carrera Sant Braulio de Zaragoza.

Antimás d’as charradas y o teatro, en o Centro Social Librería La Pantera Rossa, se ferán dos tallers, t’os que cal inscribir-se-ie antis. Un primer, sobre “Muller y TIC’s“, o lunes, y un atro sobre “Las rentas basicas en movimiento. ¿una alternativa local?” o chueves. As chornadas rematarán con tot un diya adedicau t’a IV Feria d’o mercau social en Aragón que, dende a Plaza Sant Bruno, amostrará o treballo d’as entidatz que fan parti de REAS, antimás de fer-se-ie animación, tallers, exposicions, un socalce popular y un concierto.

Ta qui no pueda estar en Zaragoza, le será posible seguir por streaming as charradas. O programa completo d’as chornadas se puet consultar en a pachina web de REAS Aragón.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.