A eurocambra vulca o tractau que meteba entrepuces a la cultura libre en internet

478 parlamentarios han votau en contra de l'ACTA, un alcuerdo internacional ta protecher a propiedat intelectual

Chambreta contra l'ACTA (Foto: Parlamento Europeu)

Chambreta contra l’ACTA (Foto: Parlamento Europeu)

O plen d’o Parlamento Europeu reuniu en Estrasburgo ha vulcau l’Alcuerdo Comercial d’Anti-Falsificación. 478 europarlamentarios han votau en contra de l’ACTA y, alavez, no se podrá aplicar en garra cabo d’a Unión Europea. 39 diputaus en han votau a favor, entre que 165 han esleixiu abstener-se. Iste alcuerdo comercial, que preba de combatir o trafico de falsificacions y a violación d’a propiedat intelectual a ran internacional, ha causau muita polemica. Bi ha más de 2,8 millons de ciudadans europeus que han sinyaua favor de frenar a suya aplicación, más que más porque creyen que va contra a libertat d’expresión en internet. Se tracta d’a primer vegada que l’Eurocambra fa servir un d’os nuevos poders que le da o Tractau de Lisbona ta refusar un tractau de comercio internacional.

O mes de chiner d’ACTA estiósinyada por vintidos estaus miembros d’a UE, pero caleba que a eurocambra lo ratificase. Cinco comisions d’o Parlamento Europeu ya han recomendau de refusar l’ACTA: a de Libertatz Civils, Chusticia y Afers d’Interior, a d’Insutria, Investigación y Enerchía, la d’Afers churidicos y la de Desembolique.

A istas se i sumó a semana pasada a comisión de Comercio Internacional, que aprebó por decinueu votos a favor y dotze en contra una recomendación a lo plen ta que no acceptase l’alcuerdo internacional. L’Eurodiputau Raül Romeva, miembro d’ista comisión, ha explicau en o blog suyo o motivo d’o refús.

O tractau tien como obchetivo enfortir l’aplicación d’as normas de protección d’os dreitos de propiedat intelectual, luitar contra a piratería en internet y evitar a importación de biens falsificaus. Os principals argumentos d’os que refusan l’ACTA son que vulnera as libertatz en internet y o concepto de cultura libre, ya que podría permitir que grans interpresas censurasen información en o rete. Tamién se qüestiona si podría violar dreitos humanos como l’acceso universal a la salut, a causa de la restricción de l’emplego de medicinas chenericas.

Totz os partius politicos s’han amostrau en contra  de l’aplicación de l’alcuerdo. A excepción ye o Partiu Popular, que considera que ye un buen alazet ta luitar contra a falsificación de biens y la piratería a ran internacional. A colla popular demanda de no fer a votación dica saber que dictamina o tribunal d’a Unión Europea.

A Unión Europra negoció fa meses l’ACTA con os Estaus Unius, Australia, Canada, Corea d’o Sur, Chapón, Marruecos, Mexico, Nueva Zelanda, Singapur y Suiza. Vintidos estau se’n amostraron partidarios, entre que Alemanya, Eslovaquia, Estonia, os Países Baixos y Chipre se’n negoron. Ta que o texto dentrase en vigor en a UE caleba a ratificación de man d’o Parlamento Europeu, que podeba acceptar u refusar o texto, pero no modificar-lo. Ta que dentre en vigor a ran mundial caldría que estase ratificau por un minimo de seis d’os estaus que lo negocioron.

 

Fuent: http://www.vilaweb.cat/noticia/4025826/20120704/leurocambra-tomba-tractat-posa-traves-cultura-lliure-internet.html

Deja un comentario

Tu dirección de correo electrónico no será publicada. Los campos necesarios están marcados *

Connect with Facebook

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.