A eurozona se mira de desbloquiar o segundo rescate de Grecia

Una semana dimpués de l'aprobación de nuevas midas d'austeridat, o gubierno griego aspera ubrir a vía ta cobrar os 130.000 millóns d'euros.

Lukás Papadimos, primer ministro griego. (Foto: Biquipedia)

Os ministros d’Economía d’a eurozona mirarán de desbloquiar hue o segundo rescate de 130.000 millons d’euros ta Grecia, que prive a fallita d’o país y a salida d’o euro. A primera ministra alemana, Angela Merkel, y os primers ministros italián, Mario Monti, y griego, Lukás Papadimos, expresoron a confianza o viernes vía teleconferencia de que pueda haber alcuerdo sobre Grecia hue de tardes. Papadimos s’entrevistó dimpués con l’homologo neerlandés, Mark Rutte, un d’os más contrarios a continar aduyando a Atenas, ta ubrir o camín ent’o segundo rescate.

L’aduya será sozmesa a condicións estrictas, porque se depositará en una cuenta bloquiada ta guarenciar que se destinará prioritariament a o pago d’a deuda y solo dimpués a financiar os servicios publicos. Amás, Atenas habrá d’enchegar antes d’o final de mes toda una serie de medidas d’achuste ya comprometidas ta recibir o fondo.

Pero encara quedan qualques tufas pendients de zarrar. Un d’os mas importants ye a estructura que tendrá a cuenta bloquiada con os diners d’o rescate. Tampoco se descarta que Alemanya, los Países Baixos y Finlandia tornen a pedir un control reforzau sobre Grecia, por eixemplo por meyo d’una troika permanent en Atenas d’a UE y o Fondo Monetario Internacional (FMI), ta guarenciar que s’apliquen as reformas prometidas.

No ye claro quántos diners aportará o FMI. Dica agora siempre s’heba feito cargo d’un tercio d’o coste d’os programas d’aduya a países d’a eurozona, pero en o segundo plan ta Grecia reducirá a contribución y podría quedar en tant solament 13.000 millons, seguntes The Wall Street Journal, cosa que aumentará a factura t’os estaus d’a UE.

Finalment s’ha descartau la ideya de rezagar o segundo rescate dica dimpués d’as eslecions anticipadas en Grecia, que se ferán en abril, tal como suchirió o ministro de Finanzas neerlandés, Jan Kees de Jager. O problema ye que s’habría de conceder en Grecia un credito puent ta cubrir o vencimiento de deuda, por valor de 14.500 millóns o 20 de marzo.

Fuent: http://www.vilaweb.cat/noticia/3986421/20120220/leurozona-mira-desblocar-segon-rescat-grecia.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.