A Feria d’o Libro aragonés de Monzón celebra a suya XIX edición

A feria recupera o nombre trilingüe, pero incluye a asociacions contra o catalán en o "diya d'a luenga aragonesa".

cartelA Feria d’o Libro aragonés de Monzón ferá en istos diyas a suya XIX edición en un inte prou embolicau t’a cultura, t’as librerías y editorials y t’as luengas aragonesas. En ista anyada Antón Castro y Chorche Paniello recibirán os premios FLA 2013. O primer por a suya faina espardindo a feria y a suya presencia cutiana en la mesma, y o segundo por a faina que fació empentando a feria dende l’empecipiallo y mientres muitas anyadas como director. D’atra man, o poeta Ángel Guinda será atro d’os protagonistas d’a feria en estar nombrau o pregoner y encargau de fer a devantadera o viernes de maitins.

O tractamiento d’as luengas ye estau a soben obchecto de polemica en ista feria y iste anyo no iba a estar-ne menos. D’una man sí que se recupera en o cartel o nombre d’a feria en aragonés, catalán y castellano, lo que yera cutiano, pero que en o cartel d’a edición pasada heba desapareixiu. D’atra, a Institución Ferial de Monzón ha incluyiu as presentacions d’os libros de asociacions contra o catalán, como Lo Timó y Amics de Fraga, en o “Diya d’a luenga aragonesa” (o sabado 7), chusto contino d’as que ferán Rolde d’Estudios Aragoneses, Gara d’edizions y Consello d’a Fabla. A polemica por a presencia d’a FACAO y as suyas asociacions en a Feria vienen de luen y qualques editorials y asociacions han protestau a soben por iste afer, mesmo plegando a procedimientos chudicials.

Os diyas 6, 7 y 8, se chuntarán en a Institución Ferial de Monzón, muitas d’as principals entidatz que publican u comercializan libros en Aragón. Entre ellas Consello d’a Fabla, Nogara, Gara d’edizions u Xordica, entre atras, i portiarán os suyos materials en luenga aragonesa. A decisión d’a Feria de no deixar vender-ie bells productos como chambretas antimás d’os libros, ha feito que entidatz como Fablans haigan deixaude ir-ie, como explican en o suyo blog,   en ista edición en no poder permitir-se os gastos propios d’a Feria.

Mientres os tres diyas, as editorials de comics, institucions, editorials, asociacions y librerías que i meterán os suyos puestos, presentarán y venderán as zaguers novedatz suyas. Tamién i serán presents muitos d’os autors ta sinyar as suyas obras y atender a qui se i amane.

 

Una rispuesta a A Feria d’o Libro aragonés de Monzón celebra a suya XIX edición

  1. Pingback: Polèmica a la Fira del Llibre Aragonès de Monsó pel tractament del català | La Franja

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.