A feria Expo Alto Galligo plega en Samianigo

A cita sera en o recinto ferial y siede d'a comarca de l'Alto Galligo an se van a dar cita arredol de 70 expositors y marcas representadas.

Imachen d'a presentación d'a Feria. (Foto: comarcas.es)

A primera Feria d’o Pirineu, Expo Alto Galligo, que se va a celebrar en Samiánigo d’o 13 a o 15 d’abril, se presentó ahiere en a Camera de Comercio de Uesca con a presencia d’a deputada de Meyo Ambient d’a Deputación de Uesca, Lucía Guillén; o president y a vicepresidenta d’a Comarca Alto Galligo, Pedro Grasa y Anabel Jal, y o responsable tecnico d’a feria, Manuel Sanz.

A deputada Lucía Guillén ha destacau en a presentación que iste tipo de ferias “cheneran muita ilusión en as comarcas y suposan un fluxo muit important no solament comercial, sino d’escaparate promocional”. En iste sentiu, s’ha referiu a las 33 ferias con as quals colabora a Deputación de Uesca y ha deseyau a os organizadors que ista Feria d’o Pirineo “sirva de punto de trobada, no solo que comarcal, sino tamién intercomarcal”.

D’atra man, o president d’a Comarca Alto Galligo, Pedro Grasa, ha feito una clamada “a totz os aragoneses” ta que s’amanen iste cabo de semana a Samiánigo. “Ye muit d’agradeixer o esfuerzo que fan as interpresas por estar presents en ista feria y aspero que lo veigan recompensau”, ha remarcau. En iste sentiu, ha destacau que Expo Alto Galligo “quiere convertir-se en un important punto de trobada t’os vecins d’a comarca, asinas como ta l’Alto Aragón, en cheneral, tenendo en cuenta o enclave estratechico de Samiánigo como prencipal vía d’acceso a o Pirineu aragonés”. Pedro Grasa tamién ha destacau que “ya somos treballando en a siguient edición, antes, mesmo, d’haber prencipiau ista, con a ideya d’aconseguir que todas as comarcas puedan estar presents en a proxima edición d’Expo Alto Galligo”. A o suyo chudicio, ista mena d’eventos “son una magnifica ferramienta ta estreitar lazos entre as comarcas, aunar esfuerzos y optimizar recursos”.

Fuent: http://www.comarcas.es/index.php/mod.noticias/mem.detalle/idnoticia.6808/relcategoria./chk.7649cba01655874ee68f5a0ee57e3392.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.