A figura de Zurita analizada en un congreso en o 500 cabo d’anyo d’a suya naixencia

Iste 4 d'aviento se facioron 500 anyadas dende que naixió qui estió o primer cronista d'o Reino d'Aragón

Devantadera d'o congreso (Foto: D.Ch.A.)

Devantadera d’o congreso (Foto: D.Ch.A.)

‘Cronica, Memoria y Historia’ ye o titol d’o congreso que analizó os diyas 4 y 5 d’aviento a figura de Jerónimo Zurita, qui estió o primer cronista d’o Reino d’Aragón y que o miercols fació 500 anyadas d’a suya naixencia.

A devantadera d’o congreso se fació en l’Alfachería con a presencia de bells cargos d’o gubierno y con a conferencia d’o profesor Guillermo Redondo.

Zurita estió una d’as figuras más importatns en a historiografía d’o Renaiximiento y tenió un papel clau en construyir a memoria d’o pasau aragonés. A importancia que tenió en a suya epoca, o contexto historico arredol d’ell u a suya influyencia en l’actualidat estioron belunas d’as qüestions tractadas en o congreso que se celebró en a Facultat de Filosofía y Letras.

O congreso se trestalló en tres partis: a primer, sobre a figura de Zurita, atra sobre como se fue constituyindo a historia d’o Reino d’Aragón a traviés d’os cronistas que vinioron dimpués y a zaguer expone o contexto a on que se movió Zurita.

En total se facioron 13 ponencias: “O panorama cultural aragonés y hispano en as envueltas de Jerónimo Zurita”; “Os Anals d’Aragón de Jerónimo Zurita”; “Zurita y o mundo clasico”; “Jerónimo Blancas y os fueros de Sobrarbe”; “Os cronistas d’a rebelión aragonesa”; “Atros testigos d’o pasau aragonés: os Paracronistas”; “Jerónimo Zurita, primer cronista d’Aragón”; “As cronicas de Corte”; “Os cronistas d’os territorios d’a Corona d’Aragón”; “Os zaguers cronistas aragoneses”; “Os cheneros historiograficos d’as ordens relichiosas en a Espanya moderna: historias de vida, memoria d’as historias”; “Os cronistas de Indias”; “Os cronistas reyals: ¿historiadors u consellers? L’eixemplo de Antonio Herrera y Tordesillas”. A charrada de zarrar la ferá o historiador Richard Kagan d’a Universidar John Hopkins.

Amplo programa d’actos

Iste congreso ye un d’os actos organizaus ta remerar o cincocientos cabo d’anyo d’a naixencia de Zurita. O programa d’actividatz ye estau coordinau por o Gubierno d’Aragón y conta con a colaboración d’atras institucions como as Cortes d’Aragón, O Chusticia d’Aragón, a DPZ y a Universidat de Zaragoza.

 

Con a enchaquia d’iste cabo d’anyo a dirección cheneral de Patrimonio Cultural d’o Gubierno d’Aragón ha creyau un portal monografico. A traviés d’a web www.sipca.es/dara se puet consultar a documentación que replegó Zurita ta escribir os suyos anals. Antimás se puet acceder a los documentos que se conservan en l’Archivo d’a Diputación Provincial de Zaragoza y de l’Archivo Historico Provincial de Zaragoza.

Ye a primer vegada que s’ufre una replega d’istos documentos y que con disponibles con nomasun clic. En iste inte ya bi ha incorporaus más de 1000 documentos y 100.000 imachens. L’obchetivo ye d’amanar a información a los usuarios, facilitar as consultas y amillorar-las ufrindo a posibilidat de fer-las tenendo aman archivos con documentación complementaria. Antimás ista iniciativa preba d’espardir a faina d’as bibliotecas virtuals.

Dos exposicions, una organizada en o Palacio de Sastago,  con o titol “Un cronista t’a Diputación Provincial de Zaragoza” y una atra en o Paraninfo d’a Universidat de Zaragoza “Libri Chronicorum, Zurita y atros cronistas” completan as celebracions.

D’atra man, o Chusticia d’Aragón, en colaboración con o profesor Guillermo Redondo, ye parando una breu publicación sobre o Chusticia d’Aragón en Zurita, con una introducción y a reproducción – con transcripción – d’a incunable Letra Intimada de  Mossen Ioan Ximenez Cerdan a Mossen Martín Díez Daux Iusticia de Aragón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.