A fiscalía demanda tres anyos de prisión t’as Pussy Riot

Tres d'as integrants son chudgadas de vandalismo por interpretar una canta contra Putin en una seu ortodoxa

A fiscalía rusa ha demandau tres anyos de prisión t’as integrants d’a colla de mosica punk Pussy Riot, que son chudgadas por haber irrumpiu en a prencipal seu ortodoxa de Moscú o febrero pasau cantando una canta con a quala demandaban a dimisión de l’alavez primer ministro, Vladimir Putin. Nadejda Tolokonnikova, Maria Aliokhina y Iekaterina Samutsevits, engarcholadas dende marzo, han estau acusadas de vandalismo, delito que preveye una pena maxima de siet anyos de prisión.

Pussy Riot ye una banda de punk rock feminista naixida l’anyo pasau. En as suyas letras, denuncian a carencia de transparencia politica, a represión d’a libertat d’expresión y a persecución d’os opositors (vidio d’una actuación). O pasau mes de febrero, cinco d’as integrants dentroron en a seu d’o Cristo Salvador de Moscú, con a cara tapada con pasamontanyas de colors, y interpretoron a canta ‘Mai de Dios, fe fuera a Putin’.

Tres d’ellas estioron detenidas, y dende marzo son en a prisión. Agora ha empecipiau o chuicio en que fan frent a l’acusación d’un delito de vandalismo, penau con siet anyos de prisión. A fiscalía en demanda tres, porque considera que ‘actuoron d’una traza extremadament vulgar ta un puesto como aquell’ y que a canta que interpretoron ye ‘faltando y un sacrilechio t’os ortodoxos’.

L’actuación yera una denuncia a l’autoritarismo ruso, pero a fiscalía diz que no estió garra acto politico, y que nomás facioron referencia a Putin ta poder argumentar que en yera. T’o fiscal, l’actuación estió ‘un pecau t’os uellos d’a sociedat’.

As tres detenidas admiten haber cometiu un delito administrativo, pero niegan estar culpables de vandalismo. Una d’as procesadas ha explicau que Pussy Riot se formó ta trucar o ficacio y criticar a las autoridatz rusas y ha dito que en garra momento quereban ofender a os cristians ortodoxos. L’advogau d’as acusadas considera que qualsiquier veredicto que no sía o d’inocencia sería ilegal.

Repercusión y refirme internacional

O caso ha teniu una gran repercusión internacional. Artistas como Madonna, Sting, Peter Gabriel, Patty Smith u Marc Almond han demandau indulchencia a favor d’as chovenas, y dica un centenar de personalidatz d’a cultura han dirichiu una carta t’o Tribunal Supremo demandando que zarre o caso.

Amnistía Internacional denuncia que as tres mullers son presas de consciencia y ha empecipiau una recullida de sinyaduras ta fer plegar a la fiscalía cheneral a exichencia de libertat immediata t’as tres mesachas.

Fuent: http://www.vilaweb.cat/noticia/4033279/20120807/fiscalia-demana-anys-preso-pussy-riot.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.