A Fiscalía pide prisión incondicional pa lo pederasta indultau por Marruecos

Daniel Galván Viña ha estau tresladau dende Murcia, do estió deteniu ahier, ta l'Audiencia Nacional. Espanya y o país norteafricano negocian una salida a la crisi ubierta por a liberación d'o pedofilo

406px-Mohammed_VI_of_Morocco

O rei Mohammed VI de Marruecos. Foto: Agência Brasil (CC-BY 3.0)

O pederasta espanyol indultau por o rei de Marruecos, Daniel Galván Viña, ya se troba en l’Audiencia Nacional, do amprará declaración debant d’o chuez Fernando Andreu dimpués d’estar arrestau ahier en Murcia.

O fiscal de l’Audiencia Nacional Pedro Martínez Torrijos ha pediu a o machistrau que ninvie a prisión a o pederasta por risque de fuga y por a gravedat d’a pena que le estió imposada (30 anyos de garchola), a l’aspera que se decida sobre a suya extradición u no a Marruecos.

Torrijos ha feito ista petición a Andreu dimpués d’interrogar entre tres quartos d’hora a Galván, que s’ha negau a estar extraditau y ha invocau o suyo arraigo en Espanya, informa Efe.

En o vidio, difundiu por o Ministerio de l’Interior, se puede veyer o momento d’a detención de Galván.

Sobre Galván pesa una orden de detención emitida por Interpol a petición d’o país norteafricano, an que compliba condena por abusar sexualment de menors. O pasau viernes un zarpau de protestas contra a suya liberación destapó o escandalo: o monarca de Marruecos, Mohamed VI, heba concediu l’indulto a o ciudadano espanyol d’orichen iraquí dimpués d’una visita oficial d’o rei Juan Carlos.

Dimpués d’un cabo de semana de remors y desmentius, o rei de Marruecos reconoixió a suya error y dio marcha ta zaga en l’indulto. Manimenos, Galván ya yera en tierras espanyolas, ta do heba plegau vía Ceuta dimpués de renovar o suyo pasaporte en o consulau.

Marruecos ha emitiu una orden internacional de detención que Espanya ha compliu. Manimenos, no pareixe tant sencillo d’extraditar a Galván de tornada t’o país magrebí ya que no existe un tractau a o respective entre totz dos países. Por ixo as autoridatz d’Espanya y Marruecos analisan cómo abordar a situación y qué trangos fer en adebant.

Fuent: http://www.eldiario.es/politica/pederasta-indultado-Marruecos-declara-Andreu_0_161683912.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.