A Fundación 29 de Junio entregó os suyos premios anyals

O Premio Aragón 2011, ta la Promotora d'a ILP "Canto a la libertat, Himno d'Aragón"

Os premiaus d'iste anyo con a presidenta d'a Fundación 29-J

Os premiaus d'iste anyo con a presidenta d'a Fundación 29-J

A Fundación Aragonesista 29 de junio, vinclada a CHA, ha entregau ista zaguera nueit os Premios Aragón 2011. Se tracta d’a ueitena edición d’uns premios con os que la fundación preba de reconoixer a labor de presonas y colectivos en esferents ambitos.

A presidenta d’a Fundación, Nieves Ibeas ha sinyalau que “os premiaus d’ista edición son l’eixemplo d’as presonas que mantienen con vida Aragón a traviés d’un triballo y una dedicación exquisita”.

O premio Aragón d’iste anyo ha estau ta la Comisión Promotora d’a ILP “Canto a la libertat, Himno d’Aragón”, seguntes a Fundación por a suya preocupación por a identidat aragonesa, y por a capacidat de achuntar l’emparo d’asociacions de muitos ambitos y intreses.

O Concello de Berbegal replegó o Premio Aragón Dignidat 2011, por “a esfensa d’o patrimonio cultural aragonés y por a valor mostrada en concarar as dificultatz ta tornar o patrimonio aragonés emigrau”. L’alcalde de Berbegal, Miguel Ángel Puyuelo esplanicó que yera un “arguello t’as presonas que luitan por o patrimonio de Berbegal recibir iste premio, que reconoix anyos de triballo”.

Atros premios entregaus estioron o Premio Aragón Cultural ta la Organización d’o Festival d’artes scenicas Gaire de Pancrudo, por fer posible un festival multidisciplinar y dignificar o mundo d’a cultura en o meyo rural, y o Premio Meyo Ambient ta Javier Blasco Zumeta por a divulgación d’a riqueza ambiental d’as estepas d’Os Monegros. En o trestallo Scientifico o Premio Aragón estió ta l’Asociación Cultural Bajo Jalón de Ricla, por ser capables dende l’asociacionismo local d’organizar dende 1989 as Chornadas de Paleontolochía Aragonesa.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.