A futura ordenación d’o bus urbano fa desapareixer seis linias en Zaragoza

O Concello d'a capital aragonesa ha presentau o primer borrador, que promete chenerar polemica. Desapareixen belunas d'as linias mas emblematicas, como a 30, y se'n modifican atras tantas

Como totz os zaragozanos sabeban, os buses d’a capital aragonesa sufrirán una reestructuración en o momento que a linia 1 d’o tramvía efectúe o servicio completo dica Parque Goya. Uns cambeos que o Concello de Zaragoza ya ha dau a conoixer y que transmitirá de traza oficial a os colectivos vecinals y a os grupos municipals en os venients días.

O dato mas important fabla d’a supresión completa d’un total de seis linias: 20, 30, 31, 45, 50 y C2. Amás, se modificará o recorriu d’a 22, 23, 28, 32, 34, 36, 40, 42, 43, 44, 52, y as nocturnas N2, N3 y N7. Por tanto, se mantendrán intactas as siguients: 21, 24, 25, 29, 33, 35, 38, 39, 41, 51, 53, 54, 55, 56, 57, 58 y C1 a las que s’unen as que ampran servicio os días d’o Pilar y os ‘bobons’  N1, N4 y N5. Con iste nuevo esquema, o concello ha quiesto eliminar os recorrius coincidents con o trazau d’o tramvía y a duplicidat d’ufierta parando cuenta tamién en a reducción de demanda que se producirá en o ret d’autobús con o trescole de viachers dica os Urbos 3.

Manimenos, se tracta d’un primer borrador tecnico que, a buen seguro, chenerará un amplio debat entre os colectivos ciudadanos. Seguntes Carmen Dueso, consellera de Servicios Publicos, l’obchectivo ye aconseguir “o maximo consenso en o disenyo final d’o ret” y no se descarta incorporar aquellas aportacions que sían factibles dentro d’uns criterios d’eficacia y d’adequación d’a mesma a las necesidatz futuras d’a ciudat.

O Consistorio ha subrayau que se mantiene o esquema basico d’un ret que pasará a contar con un total de 40 linias, d’as qualas 30 corresponden a o ret diurno -incluindo-ie as dos circulars-; tres funcionan exclusivament en as Fiestas d’o Pilar; y siet conforman o ret que ampra servicios os cabos de semana de nueitz -os conoixius ‘bobons’-. Con a reestructuración se reducirá en un 17,60% o numero de kilometros recorrius pasando de 721 a 593, d’ista forma o Concello adelagazará a futura factura d’iste servicio  ya que ha deixau claro que pagará por kilometro recorriu.

Seguntes os calculos realizaus, con o nuevo ret se podrá absorver una demanda de 90 millons de viachers a l’anyo que, chunto a os 30 millons de viachers a l’anyo d’o tramvía, suma os 120 millons que amenisterá o sistema, mantenendo a ratio meya de 5 viachers por kilometro.

Fuent: http://www.aragon2.com/n-20213-3-futura_ordenacion_urbano_hace_desaparecer_seis_lineas_Zaragoza

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.