A gala d’os XIV premios d’a mosica aragonesa deixa muito repartius os galardons

The Faith Keepers estioron os grans ganadors en replegar tres premios

O cantaire de Tako replega o premio t'a millor canta

O cantaire de Tako replega o premio t’a millor canta

Con una actuación plena de rasmia de The Faith Keepers que feba devantar-se a tot lo Teatro Principal de Zaragoza, prencipiaba iste lunes a gala d’os XIV Premios d’a Mosica Aragonesa. Ixa actuación talment yera un barrunto d’o que pasaría dimpués, pues The Faith Keepers estioron os grans ganadors d’a nueit, replegando tres d’os premios.

Virginia Martínez menó una gala por a on que pasoron arrienda personalidatz d’a mosica aragonesa de muitos estilos bien diferents. Dimpués de l’actuación de The Faith Keepers, s’entregoron os premios t’a millor web ta “Aragón tiene sed”, qui agradeixió a la mitica colla Eskoria Oriental, t’o mayor refirme, t’a revista Mondosonoro y t’o millor DJ ta DJ Potas. O nuevo premio t’a millor programación, a on que se premia a salas de conciertos y festivals lo engueró Pirineos Sur, un d’os festivals más sinyalers d’o estiu aragonés, que pasa d’a vintena d’edicions ya.

O rap de Lírico daba paso t’o segundo bloque de premios que fuoron ta Limnopolar por o millor video “Subiendo los colores”, ta Guisante por a millor producción y ta Mr Hyde por a millor portalada. Guisante, un d’os ganadors, que tamién teneba qualques candidaturas más, estió qui introdució o venient bloque.

O premio t’a colla con mayor prochección fue ta Ticket. Un premio que, seguntes os organizadors ye maldau, pues todas as collas que lo ganan se separan pasau poco tiempo. Crisálida ganó o premio t’o millor EP.  María de Miguel estió a encargada de presentar o premio t’a millor canta en luenga autoctona. A presentadora d’o programa de Aragón TV “Bien dicho”, habió de presentar-lo por sorpresa, pues s’asperaba que estasen Biella Nuei, os ganadors de l’anyada pasada, qui lo diesen, pero no i apareixioron. Os ganadors estioron Prau, por a suya canta “Os pietz en a tierra”, que da nombre a o disco. En a unica intervención en aragonés d’a nueit, agradeixioron a faina de “as collas que fan servir l’aragonés en as suyas cantas” y “t’a cultura que se fa dende os puestos chicorrons como Nogara, Arrebato, A Enrestida u Radio Topo”. En tono somarda, tamién agradeixión “a la chent que luita por a dignificación d’as luengas como Rudi, Biel u Belloch”.

Quedaban encara os premios más visteros y estió Loquillo, ganador d’o premio global d’a mosica aragonesa, qui tanyó de conchunta con Gabriel Sopeña, l’encargau de dar-ne paso. En a entrega d’o premio, Sopeña charró d’o pasau familiar de Loquillo, qui tien radices en Chiprana (Baixo Aragón – Casp). O millor disco autoproduciu estió ta Aer, qui yeran un d’os favoritos d’a nueit. O millor directo fue ta The Faith Keepers en o primer premio que replegaban ixa nueit. “El Alma atada”, de Tako, ganó o premio t’a millor canta. Mariano Gil Rones, en puyar a replegar o premio querió agradeixer-lo a los medicos que luitan contra o cancer, qüestión tractada en a canta.

Atra d’as gran sorpresas d’a nueit plegaba dimpués, quan Juako Malavirgen fació d’oficiant de una boda en o scenario d’o Principal. D’os tres zaguers premios, The Faith Keepers en replegó dos, t’a millor colla y t’o millor album, entre que Lírico estió lo premiau como millor solista. Gavy Sander’s, qui fació o suyo zaguer directo antis de retirar-se d’a mosica, replegó tamién o premio especial ta una trachectoria.

Bell poco más de dos horas dimpués de prencipiar, a gala, organizada por Aragón musical, remató con una foto a on que se chuntoron premiaus, candidatos, organizadors y presentadors. Una sobrebuena y variada representación d’a mosica aragonesa.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.