A gara de Canfranc podría visitar-se iste estiu

Os treballos de rehabilitación prencipiarán ent'a fin de mayo y durarán cinco semanas.

Gara de Canfranc (Foto: Wikipedia)

Gara de Canfranc (Foto: Wikipedia)

L’obchectivo d’a D.Ch.A. ye que a gara de tren de Canfran pueda visitar-se iste venient estiu O Consello d’Administración de Suelo y Vivienda ha alcordau iste lunes que siga la interpresa COANFI la que faiga os treballos de recuperación y conservación que calen por un importe de más de 130.000 euros.

Rafael Fernández de Alarcón, conseller d’Obras Publicas, ha explicau que “a nuestra fuella de ruta ta fer valurar a Gara de Canfranc pasa porque iste estiu ya siga visitada por adintro por as personas que lo quieran fer, y ta ixo somos fendo unas obras de minimas rehabilitación que se ferán en cinco semanas y que serán complementadas por atras obras d’interior”.

A fin ye apanyar y privar as esferras feitas por o mal orache u lo vandalismo, ta, antimás de solucionar os chandríos y guarenciar o buen estau de mantenimiento, fer un recorriu turistico y que se valure ista gara, que agora ye propiedat d’a D.Ch.A.. Ye previsto que as obras prencipien en rematando mayo y se prolarguen mientres cinco semanas.

Os treballos que se prencipiarán agora prebarán d’amillorar l’estau d’a frontera, o interior d’o sulero y o paso subterranio t’acceder t’os andadors. Asinas as fainas esvoldregarán bellas paretz, asegurarán elementos que siga en momentos de cayer-se, se zarrarán foraus en as paretz, se restaurarán puertas y finestras, se meterán cerrullos y se pintarán teitos y paretz. O programa d’actuacions antimás meterá nueva luz provisional en o sulero y s’apanyarán as luminarias y instalación electrica en partis como a frontera y o paso subterranio t’os andadors.

O consello d’administración de Suelo y Vivienda tamién quitará a licitación o desembolique de l’espacio ta exposicions adintro d’o sulero. L’obchectivo ye espardir a valor cultural d’a Gara y as obras feitas dica agora. Entre as ideyas que bi ha ye de fer servir l’interior d’os panels con que se protecherán 17 d’as puertas que bi ha en o sulero d’a Gara, ta meter-ie montaches en vinilo con textos y imachens, entre atras cosas. En o suyo disenyo punctuará tanto a valor cultural como l’intrés pedagochico d’o conteniu t’os visitants.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.