A guardia civil dispara en auguas de Chibraltar y desencadena un conflicto diplomatico

As autoridatz chibraltarencas se'n queixan a David Cameron, a qui demandan una condena contundent

Rock_of_Gibraltar_northwest

Foto: Wikipedia

As autoridatz britanicas son indignadas con o gubierno espanyol a resultas d’un incident en auguas de Chibraltar: o domingo una patrullera d’a guardia civil bi irrumpió pa interceptar una moto d’augua y plegó a disparar. O gubierno espanyol negó os feitos, pero decamín dimpués a policía chibraltarenca publicó uns vidios que contrimostraban que se producioron istes disparos. Isto ha desencadenau un conflicto diplomatico entre o gubierno de Chibraltar y o gubierno britanico, por un costau, y l’executivo espanyol, d’unatro.

O ministro prencipal de Chibraltar, Fabian Picardo, ninvió ahiere una extensa carta a o primer ministro britanico, David Cameron, queixando-se d’as incursions espanyolas en auguas chibraltarencas y de l’incident d’o domingo, y pedindo-le una respuesta prou enerchica, seguntes informa o diario Gibraltar Chronicle. ‘Ye important que Espanya sienta o peso d’a reacción britanica por as continadas violacions d’a nuestra sobiranía’, deciba Picardo en a suya carta. Y calificaba l’incident de ‘perigloso y de tot inacceptable’.

O gubierno de Chibraltar quiere que i haiga una presencia naval britanica en as suyas auguas pa aturar as incursions y pa asegurar que se respecta a sobiranía britanica.

O gubierno espanyol ha negau os feitos, y o ministro d’Afers Extranchers, José Manuel García Margallo, se queixó mesmo que o Reino Uniu protestase por ‘rumors no confirmadas’. Pero seguntes o Gibraltar Chronicle, a guardia civil admite en privau que se producioron aquells disparos. A prencipios de semana o ministro britanico en a UE, David Lidington, protestó a o suyo homologo, Íñigo Méndez de Vigo, a quí pidió explicacions.

O diario sensacionalista britanico Daily Express publicaba unas declaracions con o supuesto conductor d’a moto d’augua interceptada por a guardia civil. ‘Heba estau trahindo amigos y familiars en viaches dentro d’auguas territorials de Chibraltar‘, explicaba iste hombre, que no querió revelar o suyo nombre. ‘En un d’istes viaches, quan yera con un amigo, una embarcación d’a guardia civil me disparó como minimo quatro vegadas sin garra motivo. Habié de fer maniobras evasivas pa privar estar un blanco facil, y tamién pa privar d’estar atropellau por aquella embarcación muito mas gran’.

Fuent: http://www.vilaweb.cat/noticia/4129604/20130627/guardia-civil-dispara-aigues-gibraltar-desencadena-conflicte-diplomatic.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.