A Guardia Civil formula quasi 200 denuncias por infraccions medioambientals en o termin municipal d’Epila

Entre as infraccions denunciadas figuran nuclios zoolochicos sin rechistrar, abandono de vehíclos, u eliminación incontrolada de repuis

seprona

Foto: Guardia Civil

A Guardia Civil ha formulau 193 denuncias por diversas infraccions medioambientals cometidas en a zona d’os Cabezos, d’o termin municipal d’Epila. Tamién ha estau detenida una persona acusada d’un delito d’atentau contra achent de l’autoridat.

L’actuación parte d’o conoixencia d’a posible existencia d’afeccions medioambientals en ista zona, dimpués d’o qual, quantos efectivos de seguridat ciudadana d’o Puesto d’Epila y achents de l’Equipo de Protección d’a Naturaleza (Seprona) con base en Tarazona, realizoron un laborioso quefer que determinaba a existencia d’explotacions domesticas carents de licencia, nuclios zoolochicos sin rechistrar, animals sueltos y sin vacunar, eliminación incontrolada de repuis domesticos en a escombrera, abandono de vehíclos a la fin d’a suya vida util en a vía publica, existencia d’obras y construccions sin as legalidatz establidas y mesmo a posible existencia d’instalacions de reparación de vehíclos que no chestionaban os repuis.

En atención a dita problematica, o pasau chueves día 16 de mayo, se fació a denominada operación “Cabezo”, desembolicada con a finalidat d’inspeccionar, verificar, controlar y en o suyo caso denunciar ista mena d’infraccions.

Os achents efectuoron a intervención en a zona d’os Cabezos, a on os especialistas d’o Seprona verificoron a existencia d’un taller clandestino de reparación de vehíclos que estió inspeccionau, igual que se verificoron dos explotacions domesticas, dos nuclios zoolochicos en casco urbano sin observar normativa vichent, tres construccions carents de licencia d’obra (una d’ellas con una piscina construida d’obra), un negociador de ferralla y demás infraccions que ascendeban a un total de 102 en distintas materias.

Tamién se procedió, chunto a personal d’interpresas electricas, a comprobar as instalacions de diferents immuebles en dita zona, ya que existiban indicios de consumo ilicito de fluyiu electrico que se reverteba en o gasto publico de dita enerchía.

A resta d’efectivos de seguridat ciudadana que participoron en iste operativo s’encargoron de verificar l’abandono de vehíclos a la fin d’a suya vida util en a vía publica y unatra mena d’infraccions, d’as qualas se formalizoron numerosas denuncias.

Infraccions denunciadas

As 193 s’alazetan en a vulneración de normas como a Lei 03/2009 d’urbanismo d’Aragón, a Lei 11/2003 de protección animal d’Aragón, a Lei 22/2011 de repuis y suleros contaminaus, a Lei 12/2006 de regulación y fomento de l’actividat industrial, a Lei 06/2001 d’ordinación de l’augua, a Lei 08/2003 de sanidat animal d’Aragón, a Lei 07/2006 de protección ambiental, a Lei 16/2006 d’esfensa de consumidors, o Decreto 38/2004 de vertiu d’auguas a o cantarillau, a Lei Organica 1/92 de Protección d’a Seguridat Ciudadana, o Reglamento Cheneral de Vehíclos, u a normativa en materia de treballadors acullius a o Rechimen d’Autonomos (RETA).

As denuncias formuladas han estau remitidas a l’Autoridat competent, estando en a mayoría d’os casos o Concello d’Epila.

En ista operación han participau efectivos d’a Patrulla d’o Seprona de Tarazona, y d’os Puestos d’Epila, Calatorau, L’Almunia, Morata, Ebreya y Tarazona.

Fuent: http://www.cronicadearagon.es/wordpress/?p=41084

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.