A Guardia Civil se mira de desaloixar a os ocupants de Somontes

O PSOE d'Andalucía aconsigue que se reprima a chornaleras y chornalers en l'ature que ocupan una finca publica ta treballar-la y privar a suya venda a especuladors.

O chudgau de Posadas ordinó o pasau viernes o desaloixo d’a Finca ocupada de Somontes, en Palma d’o Río, Córdoba, como mida cautelar solicitada por a Chunta d’Andalucía y o lunes achents d’a Guardia Civil i fuón a advertir a os labradors que bi irian a chitar-los por a fuerza. “En qualsiquier inte s’enchegará a maquinaria represiva ta tornar a sacar a tierra a os chornalers y dar-le-ne a os especuladors” apuntan os ocupants d’a finca, qui a traviés d’una nota de prensa tamién acusa a o PSOE de que “en cuentas d’acceptar a negociación proposada por o SOC-SAT t’a cesión d’istas tierras publicas a cooperativas de treballadors en l’ature, ha optau por a represión pura y dura, y o consiguient estricallo de tot lo construiu en iste mes y meyo de treballo colectivo: hortal, plantación d’oliveras, torre de pirinas, animals, recuperación y labranza d’una hectaria de terreno ta la siembra de pimientos, apanyo y millora d’as instalacions de riego, viviendas y instalacions en cheneral. Y con o que quieren rematar ye más que más con a lición de dignidat, rebeldía y vida que vienen ufrindo a totz os aturaus, precarios y treballadors andaluces, istes vente labradors ocupants, chunto a os cients de personas que han emparau a ocupación con a suya presencia y treballo”.

A finca de 359 hectarias en secano y 41 en regano no yera dando treballo que a un cuidador, y se trobaba en proceso de venda en subasta por parte d’a Chunta d’Andalucía. “Dita venda hese significau que os suyos compradors, banqueros, terratenientes u especuladors, pasasen a beneficiar-se de subvencions europeas, aduyas publicas y en o suyo caso ganancias obtenidas por una explotación agricola extensiva y industrializada (ta biodisel, transchenicos, etc.) sin chenerar practicament garra puesto de treballo”. Sinyalan dende l’Asambleya de Chornalers de Somontes.

Amas, 1.700 habitadors de Palma d’o Río y mas de 4.000 en a redolada, en a suya mayoría chornalers sin tierra, son padeixendo o desemplego, los retalles socials y os desafucios d’as suyas viviendas, supportando situacions de pobreza y desesperanza.

Dende o 4 de marzo en que se prencipió a treballar en Somontes de traza colectiva, l’Asambleya de ocupants comunicó a la Consellería d’Agricultura d’a Chunta d’Andalucía que se yeran planificando inversions y treballos que pueden guarenciar a subsistencia no solo que t’os actuals ocupants sino ta decenas de familias chornaleras. Os ocupants de Somontes inciden en que “no se busca a propiedat privada ni a especulación sino que se tracta de creyar un espacio d’emplego publico y ubierto en beneficio d’o lugar. Se pretende un emplego agro-ecolochico d’o terreno, camín a la ecolochía social y a la sobiranía alimentaria. Por ixo se planteyó a l’Administración a sinyatura d’un alcuerdo de concesión de l’uso a una cooperativa de treballadors”.

Por tot isto, a Unión Local SAT-Jaén y o Comite de refirme a Somontes, ha feito un clamamiento ciudadan ta “exichir a o PSOE d’Andalucía que retire immediatament a denuncia intermesa contra os ocupants y ubra una mesa de dialogo ta trobar os mecanismos que metan ista y toda a tierra publica en mans d’os treballadors en l’ature”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.