A guerra de Mali arriba en Alcheria con un seqüestro masivo de personas

O conflicto armau de Francia contra islamistas de Mali ha cruzau as mugas y ha plegau en Alcheria, a on islamistas han seqüestrau a treballadors d'una planta de gas de BP

inaminas-1L’exercito francés fa mas intensa a suya guerra contra os islamistas en Mali. Tropas de tierra han entrau en os territorios controlaus por os islamistas. Dica agora, nomás enrestiban por aire. Con istas intervencions armadas, no han puesto aturar o conflicto. Alcheria, que teneba miedo de que o conflicto le afectase, ha visto as primeras conseqüencias. Ahiere miercols, amán de 400 personas estioron seqüestradas aintro d’una instalación de gas.

Os seqüestradors han demandau a final d’a “brutal agresión” francesa en Mali y han advertiu que Francia y os atros países serán “os responsables” d’o que le pasará a os 41 hostaches que mantienen seqüestraus, si no se cumplen as suyas demandas, seguntes un mensache que han mandau a l’achencia mauritana d’informacions ANI.

L’agresión, la ha reivindicada Mukhtar Balmukhtar, chefe d’una facción que esdeviene d’Al Qaida d’o Magreb Islamico (AQMI), que os suyos miembros son conoixius por numerosos seqüestros y por haber atacau o rally París-Dakar.

Seguntes as informacions, en primeras quereban capturar un autobús de treballadors d’un pozo de gas, pero en no poder gracias a la escolta, se’n han iu ta un puesto gasifero d’o grupo britanico BP, en In Aminas, a 1300 kilometros a o sud-este d’Alcher, amán d’a muga con Libia. Allá, han seqüestrau a 41 treballadors extranchers y amán de 350 treballadors alcherinos que poco dimpués han estau liberaus.

Entre os 41 seqüestraus, i hai 7 estadounidenses, 13 noruegos y bells ciudadanos britanicos, franceses y chaponeses. Por agora, o Reino Uniu, os Estaus Unius y Noruega han confirmau o seqüestro de ciudadanos d’os suyos estaus. O Secretaire d’Esfensa d’os Estaus Unius, Leon Panetta, ha declarau que “ixa guerra no ye nomás de Francia”.

Seguntes as autoridatz alcherinas, os seqüestradors son una vintena d’hombres venius “d’a rechión”, desmentindo asinas que haigan plegau de Mali u de Libia. Tamién han dau treslau de que l’obchectivo d’os seqüestradors ye salir d’o país con os hostaches.

Iste ataque fa realidat una d’as posibilidatz mas negativas y temidas d’o conflicto: que a violencia ise dillá d’as mugas de Mali, o qual l’Estau francés consideraba que podeba pasar.

En istos momentos, l’exercito alcherino ha atacau o puesto a on yeran os hostaches. Seguntes informacions de Le Figaro, 34 hostaches y 15 seqüestradors han estau muertos.

Fuent: http://www.jornalet.com/nova/1297/la-guerra-de-mali-arriba-en-argeria-amb-un-raubatori-massis-de-personas

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.