A historia d’Augusto en Aragón, en o Museu de Zaragoza

Continan as exposicions y actividatz por o bimilenario d'Augusto

Foto: D.Ch.A.

Foto: D.Ch.A.

O Museu de Zaragoza ye espardindo a figura de César Augusto a traviés d’un programa cultural arredol d’a exposición que plega de fer-se a suya devantadera Avgvstvs. Annvs Avgvsti MMXIV”. Estas actividatz prencipioron a pasada semana y se prolargarán mientres os cabos de semana dica la fin de chunio.

Antimás de visitas menadas, (29 de mayo y 5, 12, 19 y 26 de chunio, a las 18:30), o programa presienta una serie de tallers didacticos que s’encetoron o sabado 24. Os participants s’amanarán a lo mundo d’os cudiaus d’o cuerpo en l’Antiga Roma y treballarán con aceites y productos naturals. A letra d’Augusto será la siguient actividat organizada por o Museu de Zaragoza o 31 de mayo. En ista ocasión s’amostrará la tecnica d’a caligrafía romana.

O vestuache d’Augusto, as mascarotas u un concierto de mosica de camara serán belunas d’as actividatz que se ferán mientres chunio. As plazas son amugadas y a celebración d’os tallers penderá de que bi haiga un minimo d’asistents.

O Museu de Zaragoza tamién ha editau a guida “Romanitos. Los mellizos de Caesar Augusta” pensada  ta que os ninos d’entre 6 y 9 anyos puedan amanar-se t’a vida cutiana d’a Zaragoza de fa dos mil anyadas de man de dos ninos d’a suya edat: Cornelio y Lucrecia.

A exposición “Avgvstvs. Annvs Avgvsti MMXIV” s’amuestra a o publico dende o 18 de mayo, coincidindo con o bimilenario d’Augusto. L’obchectivo ye de fer conoixer a qui la visite la fisonomía particular que Aragón tenió t’a part d’alavez y que ha perviviu mientres sieglos. A exposición conta con quasi 200 piezas distribuyidas en quatro arias tematicas: “En o nombre d’Augusto”; “Augusto y o poder d’as imachens”, “Augusto, un mortal”, y “A obra d’Augusto”.

Esta exposición tien una segunda parte en a muestra “A vida cutiana en una colonia d’Augusto: Colonia Celsa”, que se ferá la suya devantadera o 14 de chunio en a Sección Monografica d’o Museu de Zaragoza en Viliella d’Ebro. A colonia Celsa reflexa de traza fidel como yera una ciudat en tiempos d’Augusto y a vida cutiana d’os suyos habitadors, a traviés d’a cultura material trobada en o chacimiento arqueolochico d’o debantdito lugar.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.