A “ILP d’os toros” será a unica que s’habrá aprebau en o Congreso Espanyol

Nomás ista lechislatura s'habrá empachau o tramite d'a dación en pagas, a lei t'o treballo estable y a televisión sin mugas.

Ada Colau, esfendendo a ILP d'a dación en pagas

Ada Colau, esfendendo a ILP d’a dación en pagas

Iste martes o congreso espanyol vulcará una iniciativa lechislativa popular (ILP) y en aprebará unatra: a mayoría absoluta d’o PP permitirá que se tramite a ILP ta declarar bien d’intrés cultural as corridas de toros y, manimenos, aturará a ILP t’a dación en pagas d’a hipoteca. De feito, la d’os toros será a primer iniciativa d’ista mena que o congreso habrá aprebau en toda la historia. Nunca garra atra iniciativa no ha tirau entabant: dende 1984, todas s’han desestimau: bien porque no han superau os tramites d’antis y o requerimiento de pasar d’o meyo millón de firmas, bien porque o pleno d’a cambra se i ha oposau.

En trenta anyadas s’ha presensau novanta y dos iniciativas lechislativas populars en o congreso espanyol. D’istas, once han superau o meyo millón de firmas y s’han plegau a votar en o pleno. Y dos más, a d’a dación en pagas y a d’os toros, se votarán o martes. Nomás ista zaguera s’habrá admitiu a tramite.

De todas istas iniciativas, bi’n ha dos que s’heban presentau ista mesma lechislatura: a d’a Televisión sin Mugas, presentada por Acción Cultural del País Valencià, con o refirme de 670.000 firmas; y a proposición de lei t’a faina estable y con dreitos, presentada por os sindicatos UGT y CCOO. As dos estioron aturadas.

Istas son as tretze ILP que han plegau en o pleno:
1. Regulación d’a financiación d’o sistema educativo. 1996. Con 600.000 firmas. DESESTIMADA

2. Regulación d’os libros de texto. 1997. Con 600.000 firmas. DESESTIMADA

3. Regulación d’a chornada laboral. 1998. Con 700.000 firmas. DESESTIMADA

4. Regulación d’a subcontratación en a construcción. 2000. Con 600.000 firmas. DESESTIMADA

5. Ordenación d’os medicamentos. 2000. Con 1.300.000 firmas. DESESTIMADA

6. Propuesta t’a seguridat y estabilidat en o treballo. 2001. Con 600.000 firmas. DESETIMADA

7. Propuesta ta guaranciar o poder adquisitivo d’os treballadors d’o sector publico. 2001. Con 560.000 firmas. DESESTIMADA

8. Propuesta ta modificar o codigo civil en matrimonio y adopcions. 2004. Con 1.500.000 firmas. DESESTIMADA

9. Propuesta de lei de televisión sin mugas. 2011. Con 670.000 firmas. DESESTIMADA

10. Prposición de lei t’o treballo estable y con dreitos. 2011. Con más d’un millón de firmas. DESESTIMADA

11. Regulación d’a dación en pagas, t’aturar os desafucios y t’o loguero social. 2013. Con 750.000 firmas. DESESTIMADA

12. Declaración d’a “Fiesta d’os toros” como bien d’intrés cultural. 2013. Con 590.000 firmas. APREBADA.

A unica excepción en a lista sería una iniciativa de 1996 de proposición de lei ta reclamar os dreitos comunitarios. Ista plegó a fer-se lei: una parti d’a propuesta ya iba incluyida en a reforma d’a lei d’a propiedat horizontal de 1999.

Fuent: http://www.vilaweb.cat/noticia/4082410/20130208/lunica-ilp-haura-prosperat-espanya-toros.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.