A ladera d’o entibo de Yesa se sigue movendo entre que a CHE “se mira ta atro costau”

Grupos contrarios a o recreiximiento de l'entibo de Yesa denuncian que se siguen ubrindo crepas en a ladera dreita de l'entibo pese a las obras d'a CHE

Entibo de Yesa y a ladera dreita (Foto: CHE)

Entibo de Yesa y a ladera dreita (Foto: CHE)

A ladera dreita de l’entibo de Yesa ha aumentau a suya inestabilidat dende setiembre y siguen fendo-se crepas dimpués de ueito meses d’obras día y nueit con un coste superior a os 25 millons d’euros. O movimiento no ye homochenio y en qualques zonas d’o mont a fractura contina ubrindo-se a razón de quantos milimetros a o mes.

Os aparatos de medición d’a Confederación Hidrografica de l’Ebro (CHE), en o zaguer informe que data d’o pasau 27 de setiembre, indican que en a ladera dreita de Yesa “s’aprecia un lichero incremento de movimiento, considerau como muit lento, en una zona localizada auguas alto, en o piet d’a ladera”.

O colectivo ‘Yesa+No afirma’ que os cheologos que les asesoran han notau que o desplazamiento “lo fa de traza heterochenia, no como una masa uniforme, sino plastica, por o que bi ha zonas d’a ladera en que se refirma l’entibo que pueden tener bella estabilidat, mientres en atros puntos d’o mont a fractura contina ubrindo-se a razón de qualques milimetros a o mes”.

O president d’a CHE, Xavier de Pedro, ha manifestau que “se son realizando as obras d’estabilización definitiva d’a ladera”, ta adhibir que “os chicotz movimientos que se producen son propios d’a execución d’a obra y a dinamica existent”, por o que “no bi ha garra motivo ni garra variación ta cambiar brenca d’o que dica agora s’ha veniu fendo”.

O consellero de Presidencia d’o Gubierno de Nabarra, Javier Morrás, ha negau que bi haiga habiu novedatz en o entibo y ha adhibiu que “as obras van a durar qualques anyos maitín, tarde y nueit, porque o plan que paró a CHE ye un plan a anyos vista y ixo ye o que va a continar”.

O Gubierno espanyol ha destinau 40 millons d’euros en os Presupuestos Chenerals de 2014 t’as obras de Yesa, que ya han retirau mas d’un millón de metros cubicos de tierra d’a cabecera d’o mont. As dos urbanizacions cercanas a o entibo siguen desaloixadas dende febrero, con unas 50 familias afectadas.

Coagret lamenta que a CHE siga “mirando-se ta atro costau”

Coagret, a Coordinadera d’Afectaus por Grans Entibos y Trescoles, lamenta “fundament” que a CHE contine “mirando-se ta atro costau” mientres se confirma que se siguen producindo deslizamientos en a ladera dreita de l’entibo de Yesa. “Pareixe que son 50 familias desaloixadas dende febrero, y a situación d’incertidumbre que viven localidatz como Zangoza/Sangüesa no ye suficient ta que a CHE aborde ista qüestión parando cuenta en as voces autorizadas que alertan sobre a situación en l’entibo de Yesa” denuncia Coagret.

“Trucamos o ficacio -adhibe- sobre o feito que a CHE bi haiga desoyiu a petición mayoritaria d’o Parlamento Nabarro exichindo informes independients d’a propia CHE, u que por parte de l’organismo de cuenca no haiga quiesto participar en as chornadas que se realizoron en Sangüesa fa unas semanas ta debatir sobre a seguranza en Yesa, organizadas por URA Nueva Cultura de l’Augua Nabarra, Río Aragón y Yesa + No ..”

“O feito que un informe interno d’a propia CHE, seguntes a prensa nabarra, reconoixca que a deformación d’a ladera dreita d’o entibo ye causada por as excavacions realizadas a piet d’entibo a fin d’o recreiximiento, refirma os argumentos d’os colectivos que reclamamos a paralización y o descarte d’unas obras en que se son enronando cientos de millons d’euros. Pareixe claro que os responsables d’ista mala chestión, habrían d’asumir responsabilidatz politicas, entre as que se debería producir a dimisión d’o President d’a Confederación Hidrografica de l’Ebro” concluye.

CHA critica que se siga apostando por Yesa dimpués de conoixer que a ladera se sigue movendo

CHA tamién ha criticau que se siga apostando por Yesa tot y que “bi haiga estudios que contrimuestren que a ladera se sigue crebazando y que as midas presas no son una solución”.

Joaquín Palacín, diputau de CHA en as Cortz d’Aragón critica “a o PP y a o PAR encerrinaus en iste prochecto que se les espalda”. Considera que “habrían d’asumir responsabilidatz dimpués de gastar mas de 25 millons en descargar tierra d’a ladera sin que faiga honra ta cosa”.

Ta CHA lo mas grieu ye que t’o 2014, “o Gubierno central pretende destinar 42 millons d’euros mientres retalla en infrastructuras de comunicación u en diners destinaus a las aduyas a la dependencia” y pide que “se depuren responsabilidatz”.

Fuent: http://arainfo.org/2013/10/la-ladera-del-pantano-de-yesa-se-sigue-moviendo-mientras-la-che-mira-para-otro-lado/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.