A lei de midas fiscals contará con bellas deduccions en o IRPF y bonificacions fiscals

S'han aprebau tamién atras midas tocants a las victimas d'o terrorismo, a policía local u l'Hespital Miguel Servet

Presentación d'o prochecto de lei (Foto: D.Ch.A.)

Presentación d’o prochecto de lei (Foto: D.Ch.A.)

O Gubierno ha aprebau o Prochecto de Lei de Midas Fiscals y Administrativas que incluye qüestions como deduccions por mercar os libros de textos, o loguero de viviendas socials y a dación en pagas. Antimás, l’impuesto de sucesions y donacions se bonifica en un 33%.

Con l’obchetivo de “guaranciar l’acceso a rans optimos d’amostranza publica en igualdat de condicions”, as familias que no sigan consideradas numerosas podrán deducir-se en l’Impuesto sobre a Renta d’as Personas Fisicas (IRPF) parti d’o pre d’os libros de texto d’os fillos suyos. Ista deducción, que va dende 37,50 dica 100 euros por fillo en Primaria u Secundaria, s’aplicará t’as personas con menos de 25.000 euros anyals de renta. As familias numerosas recibirán una cantidat fixa de 150 euros por fillo.

Una atra d’as deduccions por fillos en o IRPF será en atención a lo grau de discapacidat de naixius u adoptaus. Una discapacidat igual u mayor d’o 33% dará dreito a deducir-se 500 euros.

En a demba d’a vivienda, qui en meta una a disposición d’o Gubierno u beluna d’a suyas entidatz t’o Plan de Vivienda Social se podrá aplicar una deducción d’o 30% en a conduta integra aragonesa d’o IRPF. En casos de dación en pagas d’a vivienda hipotecada, se aplicarán bellas deduccions ta permitir a los afectaus “achiquir a carga fiscal” y “aliviar os suyos compromisos financiers cara ta recuperar a propiedat d’o domicilio en o futuro”.

Os afectaus por as engaronadas d’o mes pasau tendrán acceso a tipos achiquius de gravamen, tanto por concepto de transmisions patrimonials onerosas, como por o d’actos churidicos documentaus, en os actos, operacions y documentos publicos endrezaus  t’adquisición, financiación, rehabilitación y apanyo d’as viviendas cutianas y locals comercials de raso u en parti esboldregaus por l’orache d’ixos diyas.

L’impuesto sobre sucesions y donacions será obcheto d’una bonificación d’o 33% en l’anyada venient, porcentache que irá puyando en as venients anyadas dica plegar en 100% ta 2015.
Atras midas
De conchunta con ista, o gubierno ha preso atras midas de diferents contenius. A Lei de 2008 de midas a favor d’as victimas de Terrorismo s’ha modificau ta ixamplar o reconoiximiento como tals a las afectadas por actos terroristas entre 1960 y 1982 siempre que estasen naixidas d’Aragón u empadronadas en bell municipio d’o país en l’inte de l’atentau.
Tamién s’han feito conoixer as linias chenerals de l’avantprochecto de lei de coordinación de policías locals. Ista lei prebará de redefinir o modelo de policía local t’Aragón, replegando acpectos como o reconoiximiento d’a segunda actividat, a movilidat entre diferents localidatz u ixamplar a edat ta dentrar-ie dica las 35 anyadas entre atras.

En o Consello de Gubierno s’ha aprebau partidas presupuestarias de meyo millón d’euros ta l’Hespital Universitario Miguel Servet ta mercar un microscopio quirurchico oftalmolochico, un cromatografo de masas y un sembrador automatico de muestras que se ferá servir en afers bacteriolochicos.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.