A luenga aragonesa en o Camín de Sant Chaime, dende Kiel dica Santiago

En a bastida d'un prochecto europeu sobre a diversidat lingüistica en a Rota Chacobea.

L’aragonés ha estau present en os zaguers meses, en un Congreso scientifico sobre as luengas d’o celebrau en Santiago, y en una exposición multilingüe itinerant que agora mesmo se puede veyer en Kiel (Alemanya).  Isto ha estau posible mercés a o prochecto europeu “Camín d’as culturas y as luengas”, que teneba l’obchectivo d’estudiar y espardir a conoixencia d’a diversidat lingüistica y cultural en o Camín de Sant Chaime.  En ista iniciativa han participau o Estudio de Filolochía Aragonesa (Academia de l’Aragonés), a Xunta de Galicia, Euskarabidea, Euroccat, a Universidat de Toulouse, a Universidat de Kiel y a Usina d’a Luenga Bretona, y ha estau financiau endentro d’o Programa Cultura d’a Comisión Europea.

En a pachina web d’o prochecto se puede trobar información sobre o mesmo, en aragonés, y tamién información sobre l’aragonés en todas as luengas d’o camín. Tamién s’ha creyau un portal multilingüe y interactivo que se puede veyer en aragonés.

Una d’as fitas mas importants d’o prochecto ha estau a exposición itinerant titulada “Diversidat Cultural y Lingüistica en o Camín de Sant Chaime”, que conta con totz os panels traducius ta l’aragonés, y que ha estau expuesta ya en quantos lugars y ciudatz d’o Camín, como Roncesvals, Puent de la Reina, Pamplona, Santiago, y en as zagueras semanas, en Kiel (Alemanya). Ista exposición encara no ha pasau por Aragón.

Tamién en relación con iste prochecto, se celebró a zaguers d’o pasau mes d’octubre un congreso en Santiago de Compostela con o titol “As luengas y culturas d’o camín: present y futuro” a on que participoron representants d’as institucions publicas y privadas que treballan en a promoción y difusión d’as luengas d’istos territorios d’a Rota Chacobea. Representando a lo Estudio de Filolochía Aragonesa, Juan José Segura y Fernando Romanos i presentoron comunicacions sobre a codificación de l’aragonés y sobre modelos de promoción d’a diversidat cultural y lingúistica en Europa.

Fuent: O Espiello

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.