A luita por o ferrocarril une de nuevo a tot o Concello de Teruel

Todas as collas politicas d'o consistorio teruelano han tornau a aconseguir un alcuerdo unanime ta solicitar a las Administracions competents que mantenga os servicios de tren como dica o diya de hue

plenoconcelloteruelA luita teruelana por o mantenimiento d’os servicios que poseye en l’actualidat s’ha convertiu en una constant. Si fa tasas semanas as Administracions correspondients solicitaban a o Gubierno central o mantenimiento d’os Paradors de Teruel y Alcanyiz, agora a luita en os servicios de ferrocarril, en claro ‘periglo d’extinción’ dimpués d’os plans presentaus por Fomento. Dende o pleno d’o Concello de Teruel s’han amostrau claros y tallants: quieren todas as linias que actualment pasan por a capital y solicitarán a o Gubierno d’Aragón que encamine todas as suyas chestions enta ixo.

Una vegada mas, tal como pasase con a votación d’os Paradors, s’ha aconseguiu un alcuerdo total entre todas as collas municipals, que no han dubdau en tachar o servicio de ferrocarril como bella cosa “alazetal” t’a vertebración d’o territorio teruelano. D’ista traza, o Concello ha refusau oficialment “qualsiquier reducción en os servicios publicos” que l’Estau ampra en Teruel. Una proposa que se presentó a instancias d’o PSOE y de Izquierda Unida (IU) y que ha contau con o refirme de PP y CHA.

Una proposa “simpla” a uellos de Izquierda Unida y que nomás demanda que Teruel se quede como ye en l’actualidat. Manimenos, tanto ista formación como a resta de collas han coincidiu en remerar que as linias de tren actuals amenistarán milloras a curto y meyo plazo. “Cal amillorar o servicio, as freqüencias y os horarios ta fomentar o suyo emplego”, aseguran dende CHA.

En dito pleno, o PP y o PSOE han remerau tanto as inversions que s’han iu aconseguindo ta Teruel en anyos pasaus como as que habrían de venir-ie. Mayte Pérez, portavoz socialista, ha cifrau en 300 millons d’euros a cantidat invertida ta amillorar a linia que une Teruel y Zaragoza. Dende o bando socialista estiman necesario que o Gubierno d’Aragón actúe con os suyos propios meyos en o caso de que l’Executivo central elimine bell servicio. Por a suya parte, o PP ha lanzau unatro ‘mandau’ a o Gubierno aragonés remerando o compromís adquiriu por Rafael Fernández de Alarcón, consellero d’Obras Publicas, ta ir amillorando progresivament o servicio que une todas dos capitals.

Fuent: http://www.aragon2.net/n-20559-2-lucha_ferrocarril_nuevo_todo_Ayuntamiento_Teruel

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.