A manifestación de Deltebre contra o trasvase contará con presencia aragonesa

A manifestación denuncia que o Plan de Cuenca de l'Ebro no cumple as directivas europeas de chestión d'auguas y ecosistemas

Foto: Arainfo

Foto: Arainfo

A Plataforma en Defensa de l´Ebre ha convocau ta iste domingo, 30 de marzo, una manifestación que irá entre Sant Jaume d’Enveja y Deltebre, ta demandar que o Plan Hidrolochico de Cuenca contemple o cabal ecolochico que cal ta mantener l’equilibrio ambiental d’o Delta de l’Ebro. COAGRET, a Coordinadera d’Afectaus por Gran Entibos y Trasvases, refirma ista manifestación, y os colectivos aragoneses d’afectaus por entibos i serán presents en entender que “a reivindicación contra os travases, y por que bi haiga prou cabal ecolochico t’a supervivencia d’o Delta, son reivindicacions dreitament relacionadas con a luita que mantenemos contra obras como lo recreiximiento de Yesa, l’entibo de Biscarrués, Mularroya u l’entibo d’Auguaviva”.

“Ista movilización prene tot o sentiu dimpués de l’aprebación finitiva d’o Plan de Cuenca de l’Ebro, un texto que s’aluenya d’o principal obchectivo que habría de tener, o cumplimiento d’os obchectivos marcaus por a Directiva Marco de l’Augua. Cal sensibilidar sobre ixo a los habitadors d’a Cuenca de l’Ebro, y denunciar que s’ha perdiu una gran oportunidat ta chirar de tot a politica d’augua de l’estau espanyol, actualizando-la a lo momento historico actual. Un eixemplo d’ello en ye a previsión de 445.000 hectareas de nuevos reganos, t’os que a cuenca no tien prous recurso hidricos”, sinyalan dende COAGRET.

Os colectivos aragoneses d’afectaus y afectadas por entibos consideran tamién “especialment grieu, o feito de que, dimpués d’as zaguers reformas lechislativas serán posibles trasvases entre cuencas, a traviés de cesions de dreitos entre usuarios, una enchaquia más t’a movilización social en toda la cuenca. Por tot ixo, pensamos que será la Unión Europea qui habrá d’intervenir iste Plan de Cuenca, por incumplir as Directivas Marco d’Augua y Habitat”.

“A manifestación surtirá de Sant Jaume d’Enjeva ta traviesar l’Ebro por o puent “Lo Passador” y dentrar en o Deltebre dica plegar en o suyo Concello. I será o scenario dende a on que se leyerá o manifiesto, y se i ferán  qualques actuacions mosicals. A persona que s’encargará de leyer o manifiesto será Josep Bertomeu “Polet”, emblematico y conoixiu activista d’o Delta”, explican dende a Plataforma en Defensa de l’Ebre.

Como explica Manolo Tomàs, un d’os portavoces d’aPlataforma en Defensa de l’Ebre, “o plan hidrolochico que ha aprebau lo Gubierno espanyol ye simplament incomprensible. Iste plan puet estricallar o delta, han puyau un 50% os reganos arredol d’o río, y antimás fa anyadas que o cabal baixa una media d’un 10% cada anyada. Y o feitoi más grieu: en o plan aprebau o río remata en Tortosa. Ye decir, ni bi ha garra referencia tecnica ni scientifica a aquello que pueda pasar dillá de Tortosa. No han parau cuenta en iste trampo d’o río, o más protechiu, de quaranta y quatre kilometros, incluyiu lo delta. Isto ye real. Y escandaloso: t’o gubierno espanyol l’Ebro remara en Tortosa y o delta no existe. Bruselas, por suerte, ya sabe isto. Y goso decir que l’estau espanyol ferá a risa de tot en Europa. O feito de no tener en cuenta as conseqüencias d’o plan en o delta, l’ecosistema más estudiau y protechiu de l’estau espanyol, en chunto con Donyana, no se comprende. Antimás de plegar-ie muita menos augua, a calidat de l’augua que i plegará será muito pior, muito más contaminada. ¿Cómo ye posible que d’isto no se’n pare cuenta. A ignorancia ye graniza y fa pensar que be d’haber atras razons dezaga”.

 

Fuent: http://arainfo.org/2014/03/la-manifestacion-del-deltebre-contra-el-trasvase-contara-con-presencia-aragonesa/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.