A Marea azula arrocla a millars de personas en una manifestación en Zaragoza

A oposición a bellas obras hidrolochicas u a las actuals politicas de chestión de l'augua estioron belunas d'as suyas demandas

Plaza d'o Pilar

A manifestación plegando en a Plaza d’o Pilar

As diferents luitas que bi ha en Aragón arredol d’un recurso tan valioso como ye l’augua tenioron ahiere a suya voz en una manifestación que arrocló a millars de personas por as principals plazas y carreras zaragozanas. As luitas contras entibos como Mularroya, Yesa u Biscarrués, a privatización d’a chestión de recursos hidricos u a politica feita por o gubierno cuanto a las depuradoras estioron nomas belunas de todas as luitas que i participoron.

A manifestación surtiba dende quatre puntos diferents; a Plaza Aragón, a Plaza d’o Portillo, a marguin cucha d’o Puent de Piedra y a Plaza Sant Miguel. I participaban organizacions politicas, coordinadoras d’afectaus, sindicatos u movimientos socials como o 15M. Tamién se i podeban viyer chambretas d’atras mareas como a blanca y a verda, que i yeran idas amostrando a suya solidaridat. Mesmo bellas luitas de difuera d’Aragón i estioron presents como a “Red del Tajo”, a Plataforma contra la privatización d’a canal d’Isabel II u vecins d’o lugar de Candeleda en Avila, a on que son luitando contra la privatización d’as suyas auguas.

En plegar a o Coso, as quatre manifestacions, que feban como ríos portiando grans telas azulas, se chuntaban ta plegar por a Carrera Alfonso t’a Plaza d’o Pilar a on que se chuntoron fendo “un gran río”. A color azula se viyeba por tot y muitos manifestants portiaban un pin d”un rallo azul, sinyal que espardiban de baldes bells miembros d’a organización. No i faltó o Palotiau d’o Gancho u bells quantos gaiters que animoron o camín entre que se sentiban os chilso reivindicativos d’os manifestants.

Contino, o showman Fran Faguas prencipiaba a presentar a belunas d’as personas que leyoron textos. Entre ells, os afectaus por as obras u por a chestión d’os servicios de l’augua que explicoron as suyas demandas. Tamién se i cantoron bellas cantas y Emilio Gastón, qui estase Chusticia d’Aragón, recitó un poema. Se leyó o comunicau d’a Marea azula, a on que se concretaban as luitas que se yeran reivindicando y se demandaba “un nuevo modelo de chestión publica [de l’augua], participativo y transparent”. A manifestación remató con o Canto a la Libertad de Jose Antonio Labordeta, que estió cantau por toda la plaza.

 

A manifestación en a Carrera Alfonso

A capecera d’a manifestación en a Carrera Alfonso

 

A manifestación por a carrera Alfonso

A manifestación por a carrera Alfonso

 

Manifestants plegando en a Plaza d'o Pilar

Manifestants plegando en a Plaza d’o Pilar

 

 

Pancarta en a Plaza d'a Seu

Pancarta en a Plaza d’a Seu

Pancartas por o puent de Piedra

Pancartas por o puent de Piedra

Un d'os ríos por o Puent de piedra

Un d’os ríos por o Puent de piedra

Tamién i participoron luitas de difuera d'Aragón
Tamién i participoron luitas de difuera d’Aragón

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.