A Marea azula clama a “esfender os ríos d’as planificacions irracionals”

Una manifestación achuntará en a Plaza d'o Pilar de Zaragoza as reivindicacions d'o Rete Augua Publica d'Aragón

A Marea Azula en l'acción d'o pasau 16 de marzo (Foto: El Ventano)

A Marea Azula en l’acción d’o pasau 16 de marzo (Foto: El Ventano)

A luita contra la privatización de l’augua ha esdeveniu una Marea, igual como atras por a educación u a sanidat. En iste caso a color esleixida ye l’azula. Ista marea, que ya s’amostró en a manifestación d’o 23 de febrero, convoca iste sabado 23 una gran manifestación “contra la privatización de l’augua” y por “un nuevo modelo de chestión”.

A manifestación, que coincide con a celebración d’o Diya internacional de l’augua, surtirá a las 11:00 de quatre punto diferents d’a ciudat: o Puent de Piedra, a Plaza Sant Miguel, a Plaza d’Aragón y a Plaza d’o Portillo con quatre lemas diferents como “Los ríos y l’augua no se venden”, Dreito humano a l’augua”, “No a la privatización d’auguas y ríos” y “L’augua no se vende. Somos ciudadans, no pas clients”. Os quatre “ríos” d’a manifestación se chuntarán en a Plaza d’o Pilar a las 12:00 si fa u no fa, a on que bi habrá mosica, poesía y a lectura d’o manifiesto d’a Marea. Dende as quatre manifestacions se levarán tamién unas telas azulas, que cosioron en a Plaza Espanya de Zaragoza o pasau 16 de marzo, simulando ríos

En o manifiesto, que se puet leyer en o suyo blog, a Marea azula remera que “encara que l’acceso a l’augua potable y a lo saneamiento basico ye un d’os Dreitos Humanos, os mercaus continan presionando ta privatizar os servicios de l’augua y o saneamiento, transformando l’intrés cheneral en negocio y a los ciudadans en simples clients”. Concretando a luita en o país, o manifiesto denuncia que “bellas comarcas levan  anyadas pagando o canon de saneamiento sin tener depuradoras; en atras as interpresas concesionarias han deixau as obras; y en las que encara funcionan menazan con fuyidas parellanas, si no se les paga más”. Y alportan un dato: “Hue, o coste meyo d’o saneamiento en iste rete privatizau de depuradoras ye 10 vegadas más que no lo d’a depuradora publica de l’Almozara”.

O comunicau remata clamando “a totz y todas a esfender os nuestros ríos de planificacions irracionals como en estió en o suyo diya o Plan Hidrolochico”, en referencia a o PHN que incluyiba o trasvase de l’Ebro, y a “recuperar a salut d’os nuestros ríos y d’o ciclo hidrico”.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.