A Marea Narancha acusa a Rudi de deixar a millar d’aragoneses en a marguinalidat

Denuncian que l'abanrochecto de Lei de reforma de l'Ingreso Aragonés d'inserción estricalla os dreitos humans

Foto: Marea Narancha

Foto: Marea Narancha

A Marea Narancha, a traviés de l’espacio de Promoción y Esfensa d’os Dreitos Socials, acusa a la presidenta Luisa Fernanda Rudi de fer que millars d’aragoneses se’n vaigan ent’a marguinalidat. En opinión d’o colectivo l’abantprochecto de lei de reforma de l’Ingreso Aragonés d’Inserción (IAI) tien como obchectivo amugar y deixar difuera a ciudadans que dica agora podeban demandar-lo y percibir-lo.

“O Gubierno d’a presidenta Rudi pareixe que no para cuenta d’a situación grieu de tot que tienen millars de personas residents en a Comunidat”, diz iste colectivo en o suyo comunicau. Antimás, tamién remeran que “recurrir a IAI ye o zaguer medio ta guarenciar a supervivencia d’unas familias que levan sufrindo seis anyadas d’intensa crisi”.

En iste sentiu, dende Marea Narancha, tampoco no quieren ixublidar que o Gubierno d’Aragón adedica a istos aragoneses tasament o 0,5% d’o presupuesto d’Aragón entre que “dilata la concesión, vulnerando a lei, dica una anyada”. “Preba de que familias con qualques miembros sobrevivan con una cantidat d’entre los 420 y los 621 euros”, afirman.

A Marea Narancha refusa bells aspectos d’a reforma proposada por o gubierno de Rudi, como no dar o IAI a qui haigan teniu bella mena de prestación por estar aturaus si no ha pasau una anyada dende que ista rematase, igual como a imposibilidat de cobrar o IAI en as unidatz familiars que puedan tener atros ingresos, como las pensions no contributivas de 350 euros.

Enganyan a los ciudadans fendo-les creyer que as familias pueden fer compatibles qualques prestacions y asinas vivir d’o cuento. Isto ye falto. Totz os ingresos computan ta fer o calculo y a la fin o resultau puede estar un IAI de 100 euros, pero ista cantidat, en estando minima, puya bell poco los ingresos familiars y por ixo se demanda a soben”, sinyalan.

Tamién consideran una rebaixada la propuesta de puyar a dos las anyadas que un resident en Aragón ha de remanir-ie de traza contina ta poder demandar o IAI, ya que “puede haber-ie casos a on que s’haiga albandonau a comunidat en mirando treballo y en tornar no podamos tener acceso a garra prestación”.

Marea Narancha tamién ha catalogau de “xenofoba” a propuesta de fer un distingo con os vecins venients d’atros paises, ta qui se proposa d’establir dos anyadas de residencia legal. “O gubierno d’Aragón preba d’establir dos categorías de ciudadans quan totz contribuyen a o sistema y pagan impuestos”, rematan.

Dende iste colectivo se acusa a l’Executivo aragonés de querer ficar una “carga de culpabilización y sospeita” sobre qui recibe o IAI, ya que “charran de que cal controlar y ixublidan de decir que l’IAI ye a prestación social más controlada a ran administrativo”.

Por tot ixo, Marea Narancha ha convocau una concentración o venient viernes 6 de setiembre, a las 12 horas, debant d’as puertas d’a DChA. Tamién van a demandar a las collas politicas representadas en as Cortes d’Aragón reunions ta charrar-ne.

 

 

Fuent: http://www.cronicadearagon.es/wordpress/?p=43744

Una rispuesta a A Marea Narancha acusa a Rudi de deixar a millar d’aragoneses en a marguinalidat

  1. Pingback: A Marea Narancha acusa a Rudi de deixar a millar d’aragoneses en a marguinalidat | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.