A Marea Verda denuncia o malfurrie de diners d’Educación en una aplicación informatica

A ferramienta costará quasi 700.000 euros y dica agora se feba con un software de baldes.

Manifestación d'a Marea Verda o pasau 14N (Foto: El Ventano)

Manifestación d’a Marea Verda o pasau 14N (Foto: El Ventano)

Marea Verda s’ha amostrau carranyada de tot con a zaguer mida d’o departamento d’Educación, qui han quitau a concurso a implantación y mantenimiento d’una aplicación informatica de chestión academica en os institutos. Ista ferramienta costará 672000 euros y dica agora se fa de traza descentraliada con una aplicación de baldes (IES 2000) que os centros se baixan d’a pachina web d’o Ministerio.

A Marea Verda creye que “en l’actual contexto de retalladas, con miles de familias con dreito a beca de minchador y libros que no la han replegada por manca de presupuesto, o feito de que se gasten os diners en concepto como iste ye, como poco, irresponsable” y no entienden “esbarrar fundos publicos a interpresas externas si no ye ta beneficiar con ixo a personas con nombres y apellius”.

Iste movimiento, a on que s’arroclan os sectors d’o mundo educativo en esfensa de l’amostranza publica y contra as retalladas en Educación, contimpara os diners destinaus a la debandita aplicación informatica con o desapareixiu programa “Ubierto en Vacanzas” que teneba si fa u no fa o mesmo presupuesto y que se’n beneficioron miles de ninos en l’anyada pasada.

Ista zaguer mida d’o Departamento d’Educación, Marea Verda considera que ye a “enesima preba de que tot isto que dicen que ye una crisi, no ye que una gran estafa” y que “con a enchaquia de retallar, os actuals chestors d’o publico se comportan como piratas expoliando lo que ye de totz ta beneficiar a bells poquetz”.

Dende o Departamento d’Educación remeran que o programa que se feba servir de baldes “no s’actualizaba” y que o nuevo sistema “amillorará a eficacia d’os centros“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.