A mosica plega en as carreras de Mezquita d’Exarc con o IV Tamborilé

O festival de "mosica de carrera" fa a IV edición consolidando-se entre os festivals de verano

Cartel Tamborile 2012 Iste sabado, Tamborilé, o festival adedicau a la mosica y animación en a carrera, plega  una atra anyada t’o lugar de Mezquita d’Exarc, en as Cuencas Mineras. A tamás de que en atros países d’Europa ista mena de festivals son si fa u no fa comuns, iste ye l’unico d’istas trazas en Aragón.

En ista nueva edición bi actuarán mosicos que plegarán dende Francia, Croacia, Granada, Badajoz, Vitoria, Guadalachara y prou que sí, Aragón. Collas con una notable trachectoria con muitos planteyamientos diferents que se suman a las más de 22 collas y de 250 mosicos y artistas que han pasau por as carreras d’o lugar dende que prencipió lo festival.

Ista edición d’o Tamborilé prencipiará, como as anteriors con tallers de maitins. De 11:30 a 13:30 se’n ferá uno de percusión brasilenya y un atro a on que s’aprenderá a fer instrumentos con trastes viellos. Dimpués d’una actuación de l’hombre orquesta crovate Cigo man band bi habrá una chenta popular.

De tardis as actuacions de Tambores y bombos Ciudad Mudéjar, Sambiosis, Rezikletas, Funky style brass y Klandestinos levarán a mosica por todas as carreras d’o lugar. Tamién se ferá a dentrega d’o premio ‘Tamborilers de l’anyo’. T’a nueit tornarán a tanyer os mosicos acompanyaus tamién d’os ‘correfocs’ de Castelserás ‘Arraclaus’.

Un mercau d’artesanía y un concurso de fotografía tamién son entre as proposas que implen a programación d’o festival. T’os visitants, a organización ufre una zona d’acampada y facilita una chenta y cena popular. A programación completa se puet consultar en o blog d’o festival.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.