A nieu y o deschelo desborda os ríos d’a Comarca d’o Matarranya

Paradochicament, a localidat teruelana de Bezeit s'ha quedau sin augua corrient mientres o río Matarranya baixa con un cabal pocas vegadas visto

Fruito d’as intensas nevadas que sobatioron Teruel mientres a semana pasada y d’o suyo posterior deschelo -accelerau por o subito aumento d’as temperaturas y por as precipitacions en forma d’augua-, os ríos d’a Comarca d’o Matarranya teruelano presentan un “aspecto menazador” y mesmo menazan con sobreixer y engaronar diversas zonas. “En Bezeit, o Matarranya y l’Ulldemó experimentan creixidas espectaculars, as mayors d’os zaguers anyos”, confirma Josep Puche, un periodista d’a zona que ha retratau y difundiu qualques imachens espectaculars d’istos ríos.

Seguntes relata, amás d’os tradicionals problemas ta circular con l’auto por as zonas a on mas augua s’acumula, destaca tamién a situación que se vive en a localidat de Bezeit, a on os suyos vecins vivien muit pendients d’a situación d’o río Matarranya. A primera hora d’iste martes, as suyas auguas menazaban mesmo con engaronar un establimiento hostelero y una zona industrial ubicaus en instalacions d’antigas fabricas papeleras.

“Paradochicament, os vecins de Bezeit s’han devantau iste maitín sin augua corrient en casa suya, posiblement a causa d’a trencadura de canalizacions”, ha confirmau Puche. En atros puntos d’a provincia de Teruel tamién han teniu qualques problemas derivaus d’ista situación; en Val de Robles, os escolars de l’IES Matarraña no han puesto asistir a clase y s’han habiu d’estar en casa como conseqüencia d’as creixidas.

Fuent: http://www.aragon2.net/n-20659-2-nieve_deshielo_desborda_rios_Comarca_Matarrana

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.