A nueva batería que puet ‘salvar’ a las renovables

Un equipo de Harvard fa servir compuestos organicos que aduyan a almazenar enerchía en plantas y animals, ta mirar de apanyar un d'os mayors problemas d'a enerchía solar u a eolica

Michael J. Aziz, un d'os creyadors d'a nueva batería (foto: Esmateria.com)

Michael J. Aziz, un d’os creyadors d’a nueva batería (foto: Esmateria.com)

Un d’os principals problemas que fa que un mayor desembolique d’as enerchías renovables siga dificil, ye a capacidat t’almazenar a enerchía producida por fuents irregulars como lo viento u o sol. Sin ixa capacidat, se malfurria gran parte d’o suyo potencial porque os momentos de maxima producción d’enerchía por istas vías no tienen por qué coincidir con os de mayor demanda. Agora, una colla d’investigadors d’a Universidat de Harvard (EEUU) han disenyau una batería, basada en as quinonas, unas moleculas que les sirven t’almazenar enerchia a plantas y animals, que puet esdevenir una solución barata y eficient t’almazenar a enerchía solar.

Dica agora, as baterías más comuns, que fan servir electrodos solidos, como las que se fan servir en as voturas u en os telefonos movils, son masiau caras. Iste ye, en parte, a que no ye posible trestallar a potencia maxima y a capacidat d’almazenamiento. Seguntes os investigadors, ta conseguir distribuyir a enerchía eolica y solar en l’inte adequau a traviés d’o rete electrico, caldría almazenar-la mientres dos diyas. Con ista tecnolochía, si se quiere acumular a enerchía producida mientres 50 horas por un chenerador eolico d’un megawatt caldrían baterías con una potencia de 50 megawatts. Isto fería más caro l’almazenamiento parando cuenta de que si se podesen trestallar a potencia y a capacidat d’almazenamiento, nomás caldría una potencia d’un megawatt.

Una solución a iste problema son as baterías de fluxo, que permiten almazenar a enerchía en tanques difuera d’a propia batería. Dica agora, ista traza de acumular enerchía concaraba tamién problemas de pre. Os components que fan d’electrolitos en ista mena de baterías liquidas gosaban d’estar metals de mal trobar como lo vanadio u caleba metals preciosos como lo platino. En o treballo que publican en Nature, os investigadors y incheniers de Harvard miroron uns components activos con as mesmas capacidatz, pero baratos y que bi’n hese arrienda.

Fendo servir un sistema d’analisi masivo desembolicau por l’investigador de Harvard Alán Aspuru-Guzik, l’equipo calculó as propiedatz de 10.000 quinonas, un compuesto que ya s’heba planteyau como material con potencial ta fer electrodos dende 1972. D’ista traza troboron una mena de molecula que funciona tan bien como lo vanadio con l’avantalla d’o pre. Antimás, as quinonas presientan avantallas debant d’os metals como una mayor solubilidat que incrementa a densidat enerchetica que se i puet plegar con ells.

Con as moleculas organicas d’ubre un nuevo abanico de posibilidatz“, diz Roy Gordon, coautor de l’estudio, en una nota de prensa distribuyida por a suya universidat”, Belunas serán terribles y atras realment buenas y con as quinonas ya hemos trobau as primers que pareixen realment buenas”, adhibe.

A mena de quinonas emplegadas son quasi iguals a las que fa servir o Rheum rhabarbarum, una planta que se mincha en ensaladas y infusions laxants, pero los investigadors sinyalan que ista mena de compuestos organicos tamién se podrían quitar d’atras plantas y tamién de combustibles fosils como lo petrolio.

Pero encara queda muito por fer. Lo primer ye optimizar o prototipo y contrimostrar que puet aguantar o desgaste d’o almazenamiento en uns marguins de rentabilidat. Una interpresa que participa en o prochecto, Sustainable Innovations, quier que a la fin d’o periodo de desembolique, de tres anyadas, siga presto un contrimostrador comercial que o tanque suyo d’alamzenamiento sería d’a mesma grandaria que un remolque ta portiar un caballo y que podría almazenar-ie a enerchía chenerada a tot un edificio dotau con placas solars, seguntes os responsables d’o prochecto.

 

Fuent: http://esmateria.com/2014/01/08/la-nueva-bateria-que-puede-salvar-a-las-renovables/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.