A nueva Oficina Municipal de Vivienda de Uesca atiende en tres meses a 170 usuarios

Substituye a l'anterior servicio de Mediación Hipotecaria, que recibió en o suyo momento criticas por a suya falta d'eficacia

Inauguración d'a Oficina de Vivienda de Uesca o pasau 14 de chuliol. Foto: Concello de Uesca

Inauguración d’a Oficina de Vivienda de Uesca o pasau 14 de chuliol. Foto: Concello de Uesca

A Oficina Municipal de Vivienda d’o Concello de Uesca ha atendiu, dende que se metió en funcionamiento o pasau 29 de chunyo, a 170 usuarios. Qui s’han amanau dica as suyas dependencias, situadas en os baixos d’a Casa Consistorial, han solicitau aduya en aspectos referents a mediación de loguer, mediación hipotecaria, asesoramiento enerchetico y, de forma mayoritaria, l’acceso a la Bolsa de Loguer Social.

Asinas, con datos a 15 de setiembre, o 83% d’as personas que han acudiu a la Oficina Municipal de Vivienda l’han feito intresadas en a Bolsa de Loguer Social, bien porque se trobaban en una situación de lanzamiento por impago d’o loguer, bien porque buscaban una millora de vivienda. Son muitos os que tamién han solicitau información sobre as aduyas a o loguer u a la rehabilitación. O 17% restant s’ha intresau por una mediación en o loguer, bella cosa cada vegada mas habitual, sinyalan os tecnicos, a causa d’a creixent variedat que ofreixen os contractos, y que chenera dubdas sobre qué parte debe asumir determinaus gastos.

Fernando Justes, concellero de Vivienda en o consistorio uescano, explica que iste “yera un servicio muit demandau, como contrimuestra que en solament tres meses haiga recibiu a mesma cantidat de familias que l’anterior oficina en quasi tres anyos”. Justes, edil por o grupo Aragón Sí Puede y activista d’a plataforma Stop Desahucios de Uesca, fa referencia a la Oficina de Mediación Hipotecaria, un organismo creyau entre a pasada lechislatura d’a popular Ana Alós.

L’anterior servicio teneba un formato y orientación muit diferent a l’actual: solament ubriba dos días a la semana, yera atendida por un equipo d’advogaus que iban rotando y priorizaba l’atención churidica. En o suyo momento ya fue criticada por Stop Desahucios y tamién por CHA por a suya falta d’eficacia. O propio Concello de Uesca, ya baixo o mandau d’o socialista Luis Felipe, solicitó en octubre de 2015 deixar sin efecto o convenio d’a Oficina, sinyau entre o propio consistorio, o Gubierno d’Aragón y o Colechio d’Advogaus, por no haber dau “os frutos deseyaus”.

Seguntes informó alavez o Diario del Altoaragón, o balance d’a Oficina, dimpués de dos anyos y medio de recorriu, se resumiba en a tramitación d’una dación, un loguer social y l’adchudicación de quatre pisos.

A nueva ‘versión’ tampoco no s’ha librau d’a polemica. O Partiu Popular uescano, agora en a oposición, ha reprochau a o consistorio que a Oficina tienga a chestión externalizada, ya que o servicio se quitó a concurso y ye en mans d’una asociación de consumidors.

O loguer social, “zaguer paso”

Justes sinyala que l’obchectivo prioritario de l’actual Oficina Municipal de Vivienda ye a “prevención”, por ixo, como “zaguer paso”, se tramita a inscripción en a Bolsa de Loguer Social d’o Gubierno d’Aragón pa la concesión d’una vivienda.

O concellero insiste que “se va a dar un seguimiento a las familias pa comprobar que se siguen complindo os requisitos que se piden, porque l’obchectivo d’as viviendas socials no ye que se cronifique a suya estancia en ellas, sino fer un poder pa que a situación d’istas personas amillore pa que o día de manyana puedan estar economicament independients”. Actualment, o Concello conta con 15 viviendas pa loguers socials, pero luego podrían estar mas, ya que se va realizar una campanya de captación similar a la que ya ye en marcha en Zaragoza.

Deudas “descomunals” pa las familias

César Torres, tecnico d’a Oficina Municipal de Vivienda, sinyala que, mesmo quan no se son producindo desaloixos de primeras viviendas por deuda hipotecaria en l’actualidat, han de mantener-se con a guardia alta. “Encara que as familias remaneixcan en a casa, o proceso d’execución hipotecaria sigue ta debant: o banco se queda con a propiedat y os inquilinos se quedan con una deuda descomunal”, explica.

Cita como eixemplo o caso de pisos d’o barrio d’o Perpetuo Socorro, con un pre de mercau que en l’actualidat oscila en os 12.000 euros pero, en haber crompau en pleno boom immobiliario, son inscritos por una valor de 100.000 euros; una diferencia que suposa un enorme lastre pa las familias. En istas condicions, “a negociación d’a deuda, con seguntes que bancos, se convierte en una batalla permanent”, cuenta Torres.

Óscar Senar pa ElDiario.es Aragón

Fuent: http://www.eldiario.es/aragon/sociedad/Oficina-Municipal-Vivienda-Huesca-hipotecaria_0_559594132.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.