A nueva regulación d’enerchías renovables podría perchudicar graument a Aragón

Os chicotz inversors serían os mayors perchudicaus. A cheneración d'enerchía renovable ye un sector economico clau en Aragón

Aerocheneradors en A Muela (Foto: Willtron)

Aerocheneradors en A Muela (Foto: Willtron)

Ista semana s’ha publicau o Reyal Decreto d’o Ministerio d’Industria espanyol que regula a producción d’enerchía electrica dende fuents renovables. Ista norma elimina o sistema de primas actual por producción y lo cambea por una remuneración guidada por a inversión realizada d’alcuerdo con a potencia instalada.

Ista norma, que suposa un retalle de 1.700 millons d’euros, podría afectar a la rentabilidat y pervivencia d’un 60% d’os parques eolicos aragoneses, que deixarían de recibir primas, mas que mas os anteriors a 2005 que seguntes o ministerio ya habrían alcanzau a rentabilidat que cal pa no amenistar aduyas, o que no ye compartiu por os productors. Os chicotz productors d’enerchías renovables, mayoritariament familias, serían os grans perchudicaus, pus encara son pagando creditos.

Agora, o Ministerio d’Industria habrá de decidir qué retribución tendrá cada instalación parando cuenta en a suya capacidat de cheneración d’enerchía y l’anyo en que empecipió a funcionar. Alto u baixo a retribución será d’un 7% d’a inversión mientres a vida util d’a instalación.

Pero no nomás afectaría a os parques eolicos, tamién a plantas fotovoltaicas u centrals minihidraulicas, a mayoría chicotz invesors que veyen como agora podría frenar-se o suyo desenrollamiento. Inversors y interpresarios son asperando a o desenrollamiento d’o reyal decreto pa empecipiar accions legals pa prebar de recuperar as suyas aduyas.

Aragón produce si fa u no fa un 45% d’enerchía con enerchías renovables. Ista nueva norma podría fer rebaixar a cifra productiva en un sector clau en a economía aragonesa.

Una rispuesta a A nueva regulación d’enerchías renovables podría perchudicar graument a Aragón

  1. Pingback: A nueva regulación d’enerchías renovables podría perchudicar graument a Aragón » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.