A ONU apreba o primer tractau sobre o comercio d’armas

Ha estau acceptau por 154 votos a favor. Irán, Corea d'o Norte y Siria se i han oposau y 23 estaus s'han absteniu

onuL’Asamblea Cheneral d’a ONU ha aprebau o primer tractau internacional sobre o comercio d’armas, con o refirme de 154 países, a oposición d’Irán, Corea d’o Norte y Siria, y l’abstención de 23 estaus, entre ells Rusia. L’alcuerdo regulará un comercio que mueve 70.000 millons de dolars cada anyo en tot o mundo y vinclará o permiso de vender armas a la situación d’os dreitos humanos de cada país.

A semana pasada Irán, Corea d’o Norte y Siria ya empachoron o tractau, y obligoron a fer una votación en l’Asamblea Cheneral que hue os partidarios d’o texto han ganau. Agora cada estau podrá decidir si lo sinya y lo ratifica. Ta que entre de raso en vigor fan falta cinquanta ratificacions.

O tractau internacional por o comercio d’armas se podrá empecipiar a sinyar dende o diya 3 de chunio, y entrará en vigor a os tres meses d’haber estau ratificau por os cinquanta países. Os estaus que l’adopten habrán de mirar-se con lupa totz os contractos d’armamento ta no vender armas a estaus a on i hai un embargo, como actualment en Siria, u bien allá a on s’abusa d’os dreitos humanos u d’o dreito internacional.

Entre os países que s’han absteniu en a votación, i hai grans productors d’armamento como por eixemplo Rusia u China. Ta Moscú, o texto no especifica prou qué cal fer en os casos de vendas d’armas a achents no gubernamentals, como grupos rebeldes u terroristas. Amás, tamién s’abstenioron Cuba, Venezuela, Bolivia y Nicaragua. Os Estaus Unius, que ye o país d’o mundo que exporta mas armamento, ha votau a favor a tamás d’a oposición interna de l’Asociación Nacional d’o Rifle. Seguntes iste grupo de presión, a normativa d’a ONU podría afectar o dreito d’os ciudadanos norteamericanos de portar una arma.

Fuent: http://www.vilaweb.cat/noticia/4101122/20130402/lassemblea-general-lonu-aprova-primer-tractat-comerc-darmes.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.