A ONU demanda a lo Vaticano investigar totz os casos de pederastia

O Comité sobre os dreitos d'o nino demandan que se faiga publicos os archivos sobre casos d'abuso infantil y indemnizacions t'as victimas

O Papa Francisco en a suya primer misa (Foto: Wikipedia)

O Papa Francisco en a suya primer misa (Foto: Wikipedia)

O Comité d’a ONU sobre os Dreitos d’os Ninos ha demandau a lo Vaticano que “saque de camín” a totz os miembros d’o clero que se sabe u se sospeita que han teniu casos de pederastia u abusos sexuals, entragando-los a las autoridatz civils.

A ONU responde asinas a un informe presentau por l’Estau vaticano fa bellas semanas a on que se presentan as midas que heban preso ta condenar y prevenir os casos d’abusos sexuals y protecher a los menors.  O Comité demanda tamién a la Santa Siede que faiga publicos os suyos archivos sobre casos de abusos sexuals y manifiesta a suya preocupación por o conoiximiento que’n teneban. L’organismo d’a ONU ye de tot “preocupau porque a Santa Siede no ha reconoixiu lo grieu que son os crimens cometius, no ha preso as midas que calen ta concarar os casos d’abuso sexual infantil y ta protecher a los ninos y ha preso as politicas y practicas que han levau a continar l’abuso y a la impunidat d’os abusadors”, sinyalan en l’informe.
Dende o Vaticano esfienden os programas que se son desembolicando ta prevenir os abusos infantils, sinyalando belunas d’as directrices creyadas por as Ilesias locals. Tamién sinyalan que ista mena de conductas se dan “entre os miembros d’as profesions más respetadas d’o mundo, incluyius os miembros d’o clero y atro personal d’a Ilesia” y que istos crimens “nunca no pueden chustificar-se, rai si se fan en casa, a escuela, l’esporte u en organizacions y estructuras relichiosas”.
A ilesia creyó iste pasau mes d’aviento una comisión de propio ta iste afer, a la que a ONU le diz que “habría d’investigar totz os casos d’abuso sexual infantil igual como a conducta d’a cherarquía catolica debant d’istos feitos”. Silvano Tomasi, representant d’o Vaticano en a ONU anuncia antimás que “ye bienvenida qualsiquier sucherencia de man d’o Comité que pueda aduyar-les a promover o respeto d’os dreito d’a nineza y a guarenciar una apliación eficient d’a Convención y os suyos protocolos”.

Una rispuesta a A ONU demanda a lo Vaticano investigar totz os casos de pederastia

  1. Pingback: A ONU demanda a lo Vaticano investigar totz os casos de pederastia | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.