A ONU exiche a Espanya a creyación d’una comisión d’a verdat sobre os crimens d’o franquismo

O comité d'as Nacions Unidas contra as Desaparicions Forzadas critica a interpretación feita d'a lei d'amnistía

Representación de victimas d'o franquismo. Foto: Xanti Fakir

Representación de victimas d’o franquismo. Foto: Xanti Fakir

O comité d’a ONU contra as Desaparicions Forzadas ha exichiu a o Estau espanyol que investigue ‘todas as desaparicions’ d’o franquismo ‘de traza exhaustiva y imparcial, independientment d’o tiempo transcorriu y encara que no i haiga garra denuncia formal’. En o suyo informe sobre os crimens d’o franquismo, a ONU avisa que cal ‘superar os obstaclos churidicos d’orden interno que puedan empachar as investigacions, en particular a interpretación que s’ha feito d’a lei d’amnistía‘. O comité tamién recomienda a creyación d’una comisión d’a verdat encargada ‘de determinar a verdat sobre as violacions a os dreitos humanos d’o pasau’.

L’informe d’o comité contra as Desaparicions Forzadas d’a ONU reclama que ‘os presuntos autors’ d’os crimens d’o franquismo sigan ‘chudgaus, y, si son declaraus culpables, sancionaus d’alcuerdo con a gravedat d’os suyos actos‘ y que as victimas ‘reciban a compensación adequada’.

O texto recuerda que ‘a busca d’as personas que han estau sozmesas a desaparicions forzadas y l’aclaración d’o que les pasó son obligacions d’o Estau‘. A ONU avisa que os familiars d’as victimas tienen ‘dreito a saber a verdat’. En iste sentiu, o documento aprebau por o comité exiche que Espanya ‘adopte todas as midas necesarias, incluindo l’asignación de recursos de personal, tecnicos y financiers suficients, pa buscar y aclarir qué pasó’ con as personas desapareixidas.

A ONU pide a o Estau que ‘os plazos de prescripción’ d’os delitos ‘se conten efectivament dende o momento en que s’acaba a desaparición forzada, ye decir, quan a persona amaneixe con vida, se troban os suyos restos u se le restituye a identidat’.

L’informe destaca que o Estau espanyol habría d’establir ‘un organo especifico pa buscar as personas sozmesas a una desaparición forzosa‘ que tienga os recursos suficients pa fer as suyas funcions ‘de traza efectiva’. O comité pide que se respecte ‘de forma expresa o dreito a la verdat d’as victimas‘ d’alcuerdo con l’articlo 24 d’a Convención.

En iste sentiu, o comité d’a ONU pide a creyación ‘d’una comisión d’expertos encargada de determinar a verdat sobre as violacions d’os dreitos humanos d’o pasau, particlarment as desaparicions forzadas’. Amás, tamién reclama que o Estau guarancie ‘l’aduya chudicial que calga, incluiu o suministro de todas as prebas que en tienga en o suyo poder’ pa empentar todas as investigacions que sigan escomencipiadas sobre desaparicions, tamién en atros países.

L’informe insta a Espanya a que ‘guarancie que as personas sospeitosas d’haber cometiu bell delito de desaparición forzosa no sigan en condicions d’influir dreitament u indirectament, por sí mesmos u a traviés d’atros, obstruindo as investigacions’.

Fuent: http://www.vilaweb.cat/noticia/4156485/20131116/lonu-exigeix-espanya-creacio-comissio-veritat-crims-franquisme.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.