A ONU insta a o gubierno espanyol a decir qué ferá respective d’as victimas d’o franquismo

Le concede novanta días pa que detalle qué midas prenerá. O grupo de treballo presienta un informe con recomendacions

Representación de victimas d'o franquismo. Foto: Xanti Fakir

Representación de victimas d’o franquismo. Foto: Xanti Fakir

O grupo de treballo sobre desaparicions forzadas d’a ONU ha presentau un informe a resultas d’a visita que fació en setiembre de l’anyo pasau t’o Estau espanyol. En o texto, insta a o gubierno de Mariano Rajoy a presentar, antes de novanta días, ‘un cronograma indicando qué midas aplicará ‘pa satisfacer as peticions d’o grupo y asistir a las victimas d’o franquismo, seguntes informa o diario El País.

L’informe recuerda que Espanya tiene a obligación internacional d’asumir a responsabilidat sobre as desaparicions forzadas que i habió mientres o franquismo, y d’aplicar ‘una politica d’estau comprensiva, coherent y permanent’ pa que os familiars d’os desapareixius puedan saber qué les pasó y en recuperen os restos.

Dos d’as recomendacions que fa a o gubierno espanyol son de dar mas emparo institucional y financiero a os familiars d’as victimas y de creyar una entidat que s’encargue de todas as qüestions que tiengan relación.

Tamién insta a o gubierno espanyol a elaborar un plan de busca d’os desapareixius antes con antes. Y alerta que, parando cuenta en a edat abanzada de testigos y familiars, a investigación d’a verdat y d’o paradero d’os desapareixius ha d’estar una ‘prioridat immediata’.

A ONU tamién recomienda d’investigar d’oficio y chudgar todas as desaparicions forzadas. Por ixo exiche que s’eliminen ‘totz os obstaclos churidicos internos que puedan empachar as investigacions chudicials’. Pide que a lei de memoria historica tienga prous fundos pa poder aplicar-se y diz a o gubierno que veile por a la lei que disposa a retirada d’escudos, insignias, placas y mas obchectos u mencions commemorativos d’exaltación d’a revuelta militar, a guerra y a represión d’a dictadura’.

O grupo de treballo pide que se constituiga un banco estatal d’ADN que reuna as muestras cheneticas de totz os casos denunciaus de ninos robaus; proposa de configurar una comisión d’expiertos independients pa determinar a violación de dreitos humanos entre aquells anyos; y pide a o gubierno espanyol que colabore con casos como os que s’han ubierto en Archentina sobre os crimens d’o franquismo.

Fuent: http://www.vilaweb.cat/noticia/4206016/20140730/lonu-insta-govern-espanyol-dir-fara-respecte-victimes-franquisme.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.