A oposición culpa a las politicas d’o PP-PAR d’a puyada de l’ature

Os tres partius d'a oposición sinyalan a Rudi y a las suyas politicas economicas como culpables d'a puyada de l'ature.

Javier Sada, portavoz d'o PSOE

Javier Sada, portavoz d’o PSOE

Os tres partius d’a oposición, PSOE, CHA y IU, han coincidiu en criticar as politicas d’emplego d’o gubierno refirmau por PP y PAR y en culpar dreitament a la presidenta Luisa Fernanda Rudi, d’a puyada en as cifras de l’ature conoixida iste martes. En total 116.855 personas son esqueferadas en o país, habendo puyau ista cifra un 0,59 respecto a lo mes anterior. En tot l’estau, manimenos, se rechistró una chiqueta baixada d’un 0,10%.

Javier Sada, portavoz d’o PSOE en Aragón, ha dau una atra cifra: “Entre que en Espanya ha puyau l’ature un 22%, en Aragón ha puyau un 28%, 6 puntos de diferencia pior dende que Rudi ye en a presidencia d’o Gubierno”. Sada ha calificau a la presidenta de “insensible y ineficaz ta prener midas debant d’a puyada dramatica de l’ature en Aragón. Ha culpau tamién a la reforma laboral, aprebada por o gubierno espanyol, de que os achustes fixos a chornada completa haigan baixau en un 25% y creye que a deleria de Rudi por cumplir con o deficit ye fendo-le “deixar a la bimbola a familias y a millars d’aragoneses que lo son pasando muito mal”.

Chunta Aragonesista (CHA) tamién coincide en a critica dreita t’a presidenta y creye que l’apuesta suya “ye un fracaso tan granizo que no se maquilla ni con l’emplego temporal vinclau a las zaguers vacanzas“. Ta Jose Luis Soro, portavoz d’a formación, as cifras de l’ature “son conseqüencias dreitas d’a politica de Rudi de zarrar o moneder ta cumplir con Madrit encara que ixo implique deixar a un costau a la sociedat aragonesa”. Soro creye que o gubierno “no ye capable de empentar a qui tienen iniciativa, ni de demandar financiación ta obras publicas y servicios que cheneren emplego publico y dinamicen a economía”.

Luis Ángel Romero de IU, ha anunciau que o suyo partiu demandará a lo conseller d’Economía, Francisco Bono, que “explique qual ye la politica cheneral d’o Gubierno d’Aragón en demba economica y d’emplego ta 2013 y as anyadas venients”. Ta IU, as cifras contrimuestran que “as politicas d’o PP-PAR enristen grieument contra l’emplego y en cuenta de creyar-ne, en destruyen diya par d’atro y fa que millars de familias paguen una crisi que no han creyau”. As midas d’os gubiernos espanyol y aragonés “nos levan enta l’abismo”, ha afirmau Romero.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.