A plantilla d’AUZSA podría ir a la vaga en setiembre

O comité d'interpresa sinyala que a interpresa no ha quiesto negociar y critica a mediación d'o Concello de Zaragoza

Foto: ffuentes (CC-BY)

Foto: ffuentes (CC-BY)

O comité d’interpresa d’Autobuses Urbanos de Zaragoza, antiga TUZSA, anuncia movilizacions y a posibilidat de fer vaga, dimpués de que as negociacions con a dirección d’a interpresa no arribasen a un alcuerdo. AUZSA quiere fer fuera a 153 personas (139 conductors, 2 inspectors, 6 de personal de taller y 6 de oficinas).

O comité denuncia que a interpresa “en garra momento teneba voluntat d’alcanzar alcuerdos pa evitar qualsiquier despiu no voluntario” dando-les como una unica ufierta, “a reducción d’a chornada en un 11% y reducción d’o salario en un 20% conchelau dica l’anyo 2016, acompanyau d’acceptar retalles en o nuestro convenio y a perda de complementos economicos y socials”. Pa lo comité, AUZSA “teneba muit claro o numero de treballadors que quereba forachitar”, declarando que “antes de prencipiar o periodo de negociación, a interpresa ya heba filtrau a cifra de 150 despius”.

O comité denuncia que AUZSA nomás quiere “aumentar os suyos esquimens anyals, rebaixando plantilla y empobreixendo a os suyos treballadors con o robo de dreitos socials y economicos que quiere realizar”.

Asinas mesmo, critican a o Concello de Zaragoza, que prebó de mediar entre as dos partes, considerando que ista mediación estió “tarde y mal” amás que “nomás exichió sacrificio a os treballadors acceptando descontar en un 4,40 % o salario y a chornada amás d’almitir 45 treballadors forachitaus”. Tamién dende o comité exichen a o concello que “faiga cumplir o pliego de condicions a ista interpresa, en que un requisito yera a subrogación d’a totalidat d’a plantilla y respecto a las condicions laborals, socials y economicas que sinyó a interpresa en o convenio dica l’anyo 2014 o que tamién se replegaba en o pliego”.

O comité, tot asperando as decisions d’a dirección d’AUZSA en istes venients diyas, ferá concentracions totz os chueves y asambleas chenerals (hue ya n’i hai una), asinas como a celebración d’un pleno extraordinario d’o comité d’interpresa o diya 4 de setiembre a on se decidirá quán y cómo se realizarán as vagas previstas en respuesta si a interpresa no da marcha ta zaga, cosa que a dirección niega en considerar que ya ha empecipiau o proceso legal.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.