A plantilla de CHIP Audiovisual (Grupo Heraldo) se moviliza ta amillorar as suyas condicions laborals

O comité d'interpresa clama a os treballadors a esfender os suyos dreitos dimpués de 10 anyos de precariedad

CilU7AxWsAEnQREO comité d’interpresa de CHIP Audiovisual (perteneixient a o Grupo Heraldo), furnidora de contenius informativos y esportivos ta Aragón TV, ha convocau ta ista semana una serie de movilizacions con que exichir milloras laborals y salarials t’a plantilla.

Seguntes o comité d’interpresa “a televisión autonomica acaba de fer 10 anyos con os servicios informativos como buque insignia d’a cadena y liders d’audiencia en o territorio aragonés. Pero en istos diez anyos, os treballadors que femos cada edición somos, en a suya mayoría, personal externo a la cadena”. Tamién denuncian que son “subcontrataus por a interpresa que ganó o zaguer concurso ta suministrar contenius informativos que ye CHIP Audiovisual”. Y “treballamos con un achuste temporal por obra y servicio y sufrimos l’agravio comparativo de fer-lo en unas condicions laborals y salarials muit por debaixo d’o personal laboral d’Aragón TV”. Tot l’anterior les leva a preguntar si “¿somos acaso treballadors de segunda?”.

Por ixo, o comité ha demandau midas concretas que amilloren as condicions laborals y salarials d’a plantilla y que equiparasen a suya situación a la d’o personal d’a cadena aragonesa. A primera ye una compensación economica por os cabos de semana, ya que seguntes esfienden “no ye o mesmo treballar un domingo que un luns”. A segunda ye una desconchelación salarial porque “levamos cinco anyos con o sueldo conchelau, sin aplicacions de puyada de l’IPC”. As tercera son puyadas salarials t’os treballadors con chornals mas baixos. “No ye de recibimiento que bi haiga diferencias substancials entre treballadors d’a mesma categoría” y “han de correchir y meter-se a ran”, denuncian. Y a zaguera demanda ye a conciliación laboral, familiar y personal. O comité remarca que “somos una interpresa choven” an que “a maternidat y paternidat cada vez ye mas freqüent. Pero se dificulta o dreito a la conciliación a las mais y pais”. T’o comité, a conciliación en l’actualidat “no existe”.

D’atra man se demanda a la interpresa que se siente a negociar con o Comité siempre que calga. Seguntes o comité d’interpresa “o dialogo con a direccion ye a ormino complicau e ista toma decisions unilaterals. Hemos de demandar a mediación d’a Inspección de Treballo ta bella cosa tant sencilla y lechitima como estar escuitaus”. Tamién s’ha denunciau que os treballadors no son “conoixedors d’as cuentas economicas d’a interpresa, tot y que a lei lo reconoixe” y que “sin ixos datos, a negociación ye en desigualdat de condicions”.

Por tot lo debantdito o comité d’interpresa ha convocau a la plantilla a una serie de movilizaciones ta ista semana en quantos puestos.

– Luns 16 y martes 17 a las 14:30 horas en l’Avenida María Zambrano 2, siede d’a CARTV.

– Mierques 18 a las 20:30 horas en o Paseo Independencia 29, siede de l’Heraldo d’Aragón.

– Chueves 19 a las 8:45 horas en a carrera Castillo chunto a deputaus d’as Cortz d’Aragón.

Izquierda Unida ha demandau a la interpresa que negocie as milloras reclamadas con o comité en igualdat de condicions y ha emparau as suyas reivindicacions. A formación politica ha recordau que a suya opinión siempre ha esfendiu a integración d’o servicio en a cadena publica.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.