A plantilla de FCC Parques y Chardins de Zaragoza pide a dimisión de l’alcalde Belloch

A plantilla de FCC se manifiesta hue en Zaragoza ta exichir una solución a o suyo conflicto laboral

fcc jardiner@s-en-lucha-225x300A plantilla de FCC Parques y Chardins se manifestará hue por as carreras de Zaragoza. Os chardiners y chardineras pedirán ubiertament a “dimisión d’o maximo responsable d’o consistorio zaragozano, l’alcalde Juan Alberto Belloch”, a qui fan responsable zaguero d’o conflicto laboral.

A manifestación ye convocada a las 19.00 horas, con salida dende a plaza San Miguel y final en as puertas d’o Concello d’a capital, ta denunciar “os retalles salarials y socials aplicaus por a dirección de FCC en Zaragoza y o desmantelamiento y deterioro que son sufrindo as zonas verdas d’a nuestra ciudat”. A plantilla pedirá ubiertament a dimisión de l’alcalde Juan Alberto Belloch, “sinyalamos como culpable d’o conflicto a FCC y femos responsable maximo a o Concello y a o suyo alcalde”, explican os treballadors y treballadoras.

A la manifestación ye previsto que i acudan treballadors y treballadoras d’atras contractas municipals, sindicatos, colectivos socials y vecinals, asinas como treballadors y treballadoras d’o servicio de Parques y Chardins de Madrit. O calandario de movilizacions continará o viernes, 11 d’abril, con un ature de tres horas, en que os chardiners y chardineras se concentrarán en a puerta d’o ‘nuevo’ Concello -antigo seminario- dende as 11.00 horas, “puesto an que gosa estar l’alcalde”, indican dende a plantilla de FCC.

“Si o concello y a dirección de FCC no mueven ficha urchentment nos veyeremos abocaus a una vaga indefinida dende o 24 d’abril, vaga que se preveye larga y dura”, anuncian.

T’a plantilla de FCC Parques y Chardins “a nueva contracta de Parques y Chardins ha estau adchudicada a FCC que ha decidiu de rebaixar un 21% os salarios d’os treballadors y aplicar retalles laborals y socials. Una vegada mas, os impuestos d’os ciudadanos y ciudadanas benefician a grans multinacionals en detrimento de l’emplego digno y a calidat d’os servicios publicos”.

“O gubierno Municipal sigue externalizando os servicios publicos aumentando o suyo deterioro y endeudando o present y futuro d’a nuestra ciudat. Os chardiners y chardineras no imos a permitir que se retallen os nuestros dreitos por culpa d’a situación que o Concello y as grans multinacionals han chenerau en as arcas municipals. Exichimos a rescisión d’o contracto a FCC, por incumplir a ufierta y as obligacions laborals. Exichimos a dimisión d’o concellero responsable Jerónimo Blasco, por permitir que se vulneren os dreitos d’os treballadors y que se deterioren os parques d’a nuestra ciudat”, informan dende a plantilla.

“Femos un clamamiento a la ciudadanía ta que se movilice contra istos feitos y en esfensa d’uns servicios publicos de calidat”, concluyen.

Fuent: http://arainfo.org/2014/04/la-plantilla-de-fcc-parques-y-jardines-de-zaragoza-pide-la-dimision-del-alcalde-belloch/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.