A plantilla d’o COA se tornará a concentrar dimpués de quasi un mes de vaga

Os retalles y a chestión afectan a treballadors y menors en protección

Atra d'as movilizacions d'a plantilla (Foto: Pablo Ibañez ta Arainfo)

Atra d’as movilizacions d’a plantilla (Foto: Pablo Ibañez ta Arainfo)

A plantilla de treballadors y treballadoras d’o Centro de Observación y Acogida (COA) tornará hue a concentrar-se contra la precarización d’os centros de protección de menors en risgo social de man d’o Gubierno d’Aragón. A concentración se ferá alas 12:00 en a siede de l’Instituto Aragonés de Servicios Socials (IASS).

As y os treballadors d’o COA de Zaragoza continan en vaga indefinida dende o pasau 1 de noviembre. Una vaga secundada ta protestar por os retalles en o servicio dimpués d’adchudicar-se de traza “provisional” a la Fundación de Ayuda Integral al Menor (FAIM) que chestiona o centro y ha establiu una organización d’o treballo con 23 educadors y un coordinador, quan o IASS en demandaba 26 en total, por lo que los convocants no entienden que a mesa d’achuste haiga propuesto a FAIM. Antimás, cal anyadir que l’adchudicación leva un retalle de presupuesto important, ya que a interpresa ha rebaixau un 7,5% o pre de licitación.

Cuanto a la chestión d’o Gubierno d’Aragón, Izquierda Unida, que participará en a protesta con una delegación encapezada por o suyo responsable de Politicas Socials, Paloma Lafuente, denuncia que no ye guarenciau que se cumpla a Lei de Nineza y Adolescencia, porque “amás de no meter-se os medios t’apanyar os problemas que s’han trobau, no se mete garra mena de mecanismo ta cubrir todas as necesidatz d’os menors que bi ha en os COA, quan tien a tutela suya”.

“Tot iste zancocho no perchudica nomás a las y os asalariaus sino que afecta dreitament a los dreitos d’as y os menors en protección“, denuncia Lafuente, qui fa un clamamiento a la participación d’os ciudadans en as accions que o colectivo de treballadors y treballadores convocan en defensa d’un servicio de protección de menors que “en veras guarencia os dreitos d’aquells que son responsabilidat d’Aragón”.

Fuent: http://arainfo.org/2014/11/la-plantilla-del-coa-se-volvera-a-concentrar-hoy-tras-casi-un-mes-de-huelga/#more-69766

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.