A plataforma “El Bergantes no se toca” entrega 3.300 alegacions contra l’entibo d’Auguaviva

As alegacions, replegadas en nomás que cinco días, han estau entregadas en a siede d'a CHE, chunto a representants d'atros colectivos

Bergantes-alegaciones-zgz20junio2013-Foto-EMILIO-PERDICES-1

Foto: Emilio Perdices

Mas de 100 personas s’han congregau iste maitín debant d’a siede d’a CHE en Zaragoza ta entregar as mas de 3.300 alegacions. A plataforma “El Bergantes no se toca” ha replegau en tant solament cinco días as alegacions contra o prochecto de l’entibo de laminación en o río Alcherez (Bergantes) d’Aguaviva.

As alegacions han estau elaboradas por a plataforma de conchunta con atros colectivos y organizacions, dimpués d’estudiar entre as zagueras semanas o prochecto de l’entibo de laminación en o río Alcherez. As alegacions se basan mas que mas en motivos medioambientals, ya que o prochecto suposará arrasar o LIC d’o río Alcherez, pero tamién en atros d’indole economico y social. En istas s’exposan as posibles alternativas y os motivos por os quals refusan a construccion de l’entibo.

En no prorrogar a CHE o plazo ta entregar as alegacions, dimpués de zarrar o texto, nomás i ha habiu una semana de tiempo ta replegar-las. Mientres os pasaus días representants d’a Plataforma y de Coagret han manifestau a important oposición existent a la obra, no nomás en Auguaviva soque en toda a comarca d’o Baixo Aragón, en Andorra-Sierra d’Arcos, Casp-Baixo Aragón Historico y en o Maestrat d’o País Valenciano, en que en as suyas localidatz se bi instaloron mesas y se replegoron alegacions por parte de colectivos d’a zona.

En l’acto d’entrega, chunto a las y os vecins d’Auguaviva, han estau presents representants de l’Asociación Río Aragón, Coagret, Puyalón de Cuchas, Chunta Aragonesista, y d’as Asociacions Vecinals d’a Paz y Venecia ta manifestar-les o refirme contra o prochecto d’entibo.

“Nos sentimos argüellosos de l’aconseguiu dica agora y d’a unión que mantiene o lugar frent a la esferra d’o suyo Alcherez” ha sinyalau a plataforma. Antiparti, a Plataforma tamién ha prencipiau a paranza d’un acto reivindicativo y de protesta en o río Alcherez ta iste venient sabado 22 de chunio.

Fuent: http://arainfo.org/2013/06/la-plataforma-el-bergantes-no-se-toca-entrega-3-300-alegaciones-contra-la-presa-de-aguaviva/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.