A Plataforma por a Esfensa d’a Escuela Publica denuncia que se ye “privatizando a monico” a educación publica

"As midas d'o Departamento d'Educación, Aragón va china chana ent'a privatización d'o sistema educativo", diz o portavoz d'a Plataforma.

Representants d'a Plataforma (Foto: FAPAR)

Representants d’a Plataforma (Foto: FAPAR)

“L’amostranza publica como referent y modelo de futuro”. Iste ye o titol d’o manifiesto presentau por a Plataforma por a Esfensa d’a Escuela Publica en Zaragoza, que iste martes fació una rueda de prensa ta denunciar lo que creyen que ye un proceso ta privatizar a monico l’amostranza publica en Aragón. Bi estioron presents representants d’as principals organizacions d’a Plataforma como FAPAR, MHUEL, ADEA u FABZ, os partius PSOE, CHA y IU y os sindicatos CCOO, UGT y CSIF.

O portavoz d’a Plataforma, Antonio  Lascorz enumeró as decisions que dica agora ha preso o Departamento d’Educación y que “son fendo dreitament más feble o rete publico por o tracto esferenciau que se ye propiciando dende o debandito Departamento, enantando asinas a filosofía d’a LOMCE”. En primer puesto, charró d’a “inchusticia d’uns presupuestos ta 2013 con un 14,8 % de baixada en a escuela publica y un 1,7% en a privada concertada. Y a iste tracto desigual se une, seguntes o portavoz, a puyada de radios de alumnalla por aula y a baixada de refirmes lo que empiora a situación en os centros que más diversidat acullen en as aulas suyas, quasi siempre publicos. “Con istas midas, se penaliza o compromís social d’os centros y se va enta un sistema educativo de raso descompensau impropio d’una sociedat moderna”.

A Plataforma creye tamién que “con o modelo de bilingüismo que se preba d’implantar, basau en a capacidat de cada centro ta organizar-lo, l’administración educativa torna a dar a esquena a los suyos centros publicos, dadas as esferencias normativas que bi ha ta trigar o personal”. Criticó, antimás a traza que se son aplicando os procesos de admisión de alumnalla que no consiguen empachar a triga de alumnalla por a más gran parti d’os centros privaus concertaus”. Lascorz remató sinyalando que, con todas istas midas, antimás d’as que se replegan en a LOMCE, Aragón va china chana ent’a privatización d’o sistema educativo, que prencipia fendo más feble de traza programada o sistema publico.”

Por tot ixo, a Plataforma exiche un cambio de rumbo, ta ir bastindo china chana, un modelo educativo ta un modelo social a on que, a etica publica y a equidat, sigan rasgos identitarios. Y ixe modelo educativo, seguntes a Plataforma, nomas puet estar publico, como en ye por un regular en o norte d’Europa.

Fuent: http://arainfo.org/2013/01/la-plataforma-por-la-defensa-de-la-escuela-publica-denuncia-la-paulatina-privatizacion-de-la-educacion-publica-en-aragon/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.