A plaza d’o Pilar aculle un acto en homenache a las victimas d’o franquismo y a ultradreita

A concentración ye un d'os actos convocaus por Noviembre antifaixista mientres iste mes.

cartelIste miercols, 20 de noviembre a las 19:30, Noviembre Antifaixista ferá un acto conmemorativo por as victimas d’o franquismo y a ultradreita en a Plaza d’o Pilar de Zaragoza. L’acto contará con a presencia y intervencions de familiars de personas represaliadas y un miembro d’a Coordinadera de refirme a la querella archentina contra os crimens d’o franquismo. Miembros d’ista coordinadera viacharán – o 28 de noviembre – ta Buenos Aires ta declarar debant d’a chueza. A organización aspera l’asistencia de a lo menos 200 personas que portiarán cartels con as caras d’as victimas d’o faixismo dende 1936 dica 2013.

Baixo lo lema “Recuperar a memoria, fer o mapa d’os nuestros trangos“, a organización d’istas seisenas chornadas antifaixistas quier, con iste acto, remerar a las victimas d’o franquismo y a ultradreita. “Meter cara, dar voz a todas aquellas personas que estioron victimas d’a dictadura y d’as collas faixistas. Dende o golpe d’estau, pasando por a transición, dica la democracia. A puenda de 1936 ta 2013”, explican.

“Un acto solumne – i adhiben -, a on que, dende o respeto a las victimas y a suya parentalla, as y os participants – de traza estatica y sin tartir – portiarán imachens d’as personas represaliadas. Desgraciadament son muitas y muitos qui sufrioron a represión”. Ta ixo ferán servir 200 fotos, que a traviés suyo simbolizarán a todas las personas afectadas.

“Ves-ie y si i culles podrás participar en iste acto portiando belunas d’as fotos, sinyalan. “Recuperar lo silenciau, rescatar lo obviau. Remover esmos, demandar chusticia. En homenache a qui chacen en fuesas, a los anonimos d’as cunetas, a qui duermen en calso vivo. A la memoria d’os secuestraus, d’os torturaus, d’os asesinaus.”

 

Fuent: http://arainfo.org/2013/11/la-plaza-del-pilar-acoge-un-acto-en-homenaje-a-las-victimas-del-franquismo-y-la-ultraderecha/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.