A plevia menaza la celebración d’una Cincomarzada polemica por o cambio de puesto

Bi ha un 85% de probabilidat de plevia seguntes AEMET. Ista anyada a fiesta marchará t'o Parque de Macanaz.

Chovens fendo un palotiau en a cincomarzada

Chovens fendo un palotiau en a cincomarzada

A celebración d’a fiesta d’a Cincomarzada en Zaragoza ye menazada, dimpués de conoixer-se iste miercols o parte de l’Achencia Estatal de Meteorolochía que, encara que da una puyada de temperaturas, tamién prevei una posibilidat de plevia d’o 85%. As temperaturas irán entre os 9 y os 15 graus.

Una atra vegada, o puesto a on que se celebrará se ha cambiau. Dende o Parque d’o Tío Jorge, a on que se celebraba de traza tradicional mientres muitas anyadas, a celebración marchó ta l’Almozara, t’o Parque de l’augua, a o canto d’a Expo, u t’o Parque d’Oriente, a on que ye estada en as zaguers anyadas. Manimenos en ista ocasión, o concello decidió de levar-la ent’o Parque de Macanaz. Ista decisión ha provocau o carranye d’as penyas que anuncioron que no participarían en a Cincomarzada oficial, fendo atros actos en o Parque Torreramona u en os suyos propios locals.

O concello, d’atra man, ha prencipiau iste chueves os treballos t’acondicionar o parque t’a celebración, esborgando os arbols ta privar de que o cierzo ranque brancas, como ha pasau en anteriors anyadas. Tamién ha anunciau que, encara que no bi habrá linias de bus especials t’a fiesta, se ferá un refuerzo en as normals y en o tramvía, que pasará cada diez minutos, entre as 10:00 y as 14:00.

No guaire luen, se ye instalando tamién tot lo que cal ta l’azoque napeoleonico, un mercau que se ferá en a marguin cucha d’o puent de Sant Chaime dende iste viernes, celebrando o bicentenario d’os Sitios de Zaragoza. L’azoque antimás será o scenario de diferents actividatz relacionadas con a epoca.

En a festividat, si tot va bien, s’asperan bellas 70.000 personas visitando-la en os diferents intes d’o diya y bellas 70 organizacions que i meterán o suyo puesto con virolla, bebida, información u actividatz, continando con o caracter social y reivindicativo d’a fiesta zaragozana. Tamién con ixe esprito, a Federación de Vicos dió a conoixer o chueves o lema d’ista anyada “Esfendamos lo publico“.

Atra d’as novedatz d’ista anyada ye l’emplego obligatorio de totz os puestos de vasos re-emplegables ta mirar de creyar menos vasueray cavidar en o malfurrie de plasticos. Con tot y con ixo, ya ye presto o plan especial ta escoscar a zona malas que remate a fiesta, a ixo d’as 19:00

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.