A polemica ‘lei Wert’ ya ye presta pa estar aprebada

A LOMCE ha quedau aprebada en a Comisión d'Educación con l'unico refirme d'o PP. Previsiblement se votará en o Pleno d'o Congreso o chueves venient

Foto: Ministerio d'Educación, Cultura y Esporte d'Espanya

Foto: Ministerio d’Educación, Cultura y Esporte d’Espanya

O ministro Wert ya puede alentar tranquilo. O suyo prochecto mas anglucioso, a LOMCE, ha superau ya o suyo tramite parlamentario. A Comisión d’Educación d’o Congreso d’os Diputaus ha dau luz verda a o prochecto de Lei Organica pa la Millora d’a Calidat Educativa con l’unico refirme d’o PP. O texto ha contau con o refuse de PSOE, UPyD, CiU, PNV, Izquierda Plural (IU-ICV-CHA) y l’abstención de Foro d’Asturias.

Ya solament queda que la refrende a mayoría d’o PP en o parlamento, pus en tractar-se d’una lei de caracter organico ye d’obligau cumplimiento que tamién sía aprebada por o Pleno d’o Congreso antes d’estar remitida t’o Senau. Ista aprebación se producirá, previsiblement, en o Pleno d’o chueves venient. Dimpués se ninviará dreitament a la Camara Alta pa dar-le o sí definitivo entre o cabo de noviembre y prencipio d’aviento.

A Lei de Millora d’a Calidat Educativa ha saliu d’a Comisión d’Educación con l’acceptación de 36 esmiendas parcials d’as 770 que s’heban presentau. En o dictamen d’a normativa se’n incluyoron en fase de ponencia as 42 presentadas por o Grupo Popular, asinas como atras 13 proposadas de Foro Asturias, BNG y UPN. A ellas caldría sumar-ne 21 pactadas con UPyD, UPN, Foro Asturias y Coalición Canaria. Mientres a votación no s’ha aprebau garra d’as esmiendas parcials de PSOE, CiU y PNV.

Entre os cambeos mas polemicos ye o que reforza o papel d’o castellano en a ensinyanza y especifica o suyo caracter de luenga vehicular. O texto anterior s’amugaba a mencionar que se guaranciase o dreito de totz os alumnos a educar-se en castellano. L’alcuerdo ha estau criticau especialment por os partius nacionalistas. Isabel Sánchez (PNV) ha opinau que fixar en a reforma o castellano como luenga vehicular tien un “claro component ideolochico”, y o diputau Martí Barberá (CiU) ha charrau de modelos lingüisticos “anteriors a la democracia”. O diputau popular Eugenio Nasarre ha afirmau que l’actual modelo lingüistico catalán ye perchudicial pa lo conchunto d’a sociedat de Catalunya, especialment pa las clases mas modestas y treballadoras.

Atra d’as esmiendas clarifica o papel d’o Gubierno en a evaluación final de primaria en o sentiu que le corresponderá establir os criterios d’a mesma y as caracteristicas d’as prebas pa que sían comuns en tot l’Estau espanyol. Sobre istas ‘revalidas’, o PNV ha asegurau que “responden a un intento de privatizar, relegando a las autonomías y centros a meras instancias de consulta”.

Atros d’os alcuerdos aconseguius entre PP y UPyD estableixe que a eslección d’os directors d’os centros se faiga a traviés d’una evaluación en a que se pare cuenta en, entre atras factors, os resultaus d’as prebas a os alumnos realizadas mientres o suyo mandato.

Con Foro y Coalición Canaria, os populars han pactau una esmienda sobre o refirme administrativo a la ensinyanza en as poblacions dispersas, y con o primer d’os partius citaus que tamién dende as administracions educativas se reforce o refirme a os alumnos con deficit d’atención u a os d’altas capacidatz.

“Se puede estar en contra d’una lei, pero como partiu se puede fer un poder por minimizar danyos u intentar milloras”, ha destacau o portavoz d’Educación d’UPyD, Carlos Martínez.

O Partiu Popular proposa incluir a libertat d’ensinyanza y a d’eslección de centro por os pais como prencipios fundamentals d’a educación, entre as quaranta esmiendas parcials que ultima en o Congreso a o prochecto de Lei Organica pa la Millora d’a Calidat Educativa (LOMCE).

Seguntes fuents parlamentarias consultadas por Efe, se planteya que s’incorporen en l’articlo uno, sobre prencipios y fins d’a educación.

Os diputaus de PSOE, IU, CiU y PNV han tornau a leyer o suyo compromís conchunto de derogar a LOMCE en una venient lechislatura, como alcordoron o pasau mes de chuliol.

Fuent: http://www.eldiario.es/sociedad/nueva-ley-educacion-lista-aprobarse_0_179532677.html

2 Rispuestas a A polemica ‘lei Wert’ ya ye presta pa estar aprebada

  1. Pingback: A polemica ‘lei Wert’ ya ye presta pa estar aprebada | AraInfo | Achencia de Noticias d'Aragón

  2. Poquet a poquet nos acercan a un modelo faixista de sociedat. Control social de l’Estau.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.