A policía echipcia disuelve con prou violencia l’acampada en refirme de Mursi

Os Chirmans Musulmans cifran en 300 os muertos y 7.000 os ferius, mientres que o gubierno baixa a cifra a nomás 15 muertos y 67 ferius

Protestas a favor d'o expresident Mursi. Foto: Mohamed Elsayed (CC-BY-SA)

Protestas a favor d’o expresident Mursi. Foto: Mohamed Elsayed (CC-BY-SA)

A policía echipcia ha entrau finalment en l’acampada en O Caire en refirme d’o depuesto president Mursi pa disolver-la, fendo-lo con gran violencia, habendo-ie muertos, encara que as cifras son poco claras. Partidarios d’os Chirmans Musulmans dan arredol de 300 muertos y 7.000 nafraus en a operación policial tot desaloixando as plazas de Rabea al Adauiya y de Nahda en a que a policía ha cargau durament y mesmo ha disparau fuego real y aventau gases lacrimochenos contra a chent. O ministerio de Sanidat echipcio, manimenos, da a cifra de 15 muertos y 67 nafraus. Tamién i ha habiu unas 200 detencions.

A policía habría empecipiau l’asalto aventando gases lacrimochenos, o que provocó enfrontinamientos entre totz dos bandos. A policía y os manifestants s’acusan mutuament de fer servir armas de fuego. Un reportero de Reuters informa d’a lo menos 20 personas que han recibiu disparos en as garras por parte d’a policía. Os manifestants han respondiu con piedras y coctels molotov.

Seguidors d’os Chirmans Musulmans, dimpués d’o brutal desaloixo, ha saliu t’as carreras de bellas ciudatz d’o país en protesta, como Aleixandría, Aswan y O Caire fundamentalment. S’han atacau comisarías y atros edificios gubernamentals en O Caire, Garbiya y Fayum y mesmo han blandiau una ilesia cristiana copta en a localidat de Sohag. Mientres, o gubierno ha ordenau aturar o trafico ferroviario en bella parte d’o país.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.