A policía torna a cargar en a plaza Taksim d’Istambul

Mils de personas se i han tornau a reunir iste atardeixer, dimpués d'o desaloixo d'o maitín

protestas turquía

Protestas en Pza. Taksim. Foto: Burak Turan, http://www.flickr.com/photos/rubidiculous/

Mils de personas s’han tornau a concentrar en a plaza Taksim d’Istambul horas dimpués d’estar desaloixada por a policía. A chent se’n ha iu reunindo en fer-se de nueitz, en refirme a os activistas contrarios a o gubierno de Recep Tayyip Erdogan que la ocupaban dende o sabado 1 de chunio, y a policía ha tornau a cargar, como ya l’heba feito iste maitín.

Os antidisturbios heban dentrau de maitins por primer vegada en a plaza Taksim y han cargau contra os manifestants con gases glarimochenos y canyons d’augua, con a intención de meter punto y final a la protesta. De manifestants una vintena n’han quedau ferius.

A oficina d’o gubernador local deciba que l’obchectivo d’os antidisturbios yera ‘retirar pancartas y banderas‘, tot y que han cargau fuerte, tanto en a plaza Taksim como dimpués en o parque Gezi, a on s’heban trasladau a mayoría d’os manifestants dimpués d’o desaloixo d’a plaza.

Denuncia d’Amnistía Internacional

Amnistía Internacional ha denunciau a contundent acción policial contra os activistas en a plaza Taksim y o parque Gezi d’Istambul. T’a organización se tracta d’una acción inchustificada que contradiz as declaracions feitas por o gubierno turco mientres a chornada, en que aseguraba que no intervendría en o parque.

‘As protestas en a plaza Taksim y o parque Gezi han estau de raso pacificas y tienen dreito de continar. A intervención por parte d’as autoridatz solament s’habría de producir por razons lechitimas. Querer sacar unas quantas pancartas no ye, sencillament, una chustificación adequada’, ha dito l’observador d’Amnistía Internacional en Turquía, Andrew Gardner.

Tamién ha denunciau que una setentena d’advogaus heban estau detenius quan yeran debant d’un tribunal ta fer una declaración de refirme a las protestas, y que as autoridatz s’heban negau a investigar posibles casos d’abusos. ‘En cuenta de continar reprimindo a os manifestantes pacificos, as autoridatz turcas habrían d’empecipiar a cusirar as actuacions d’a suyo policía y trahier a os tribunals a os responsables de l’escandaloso abuso que s’ha visto mientres istas dos zagueras semanas.’

O debat sobre un chardín d’Istambul que o gubierno quereba destruir ha iu creixendo dica esdevenir en un conflicto ubierto en a carrera, con manifestants ferius y enfrontinamientos constants en as prencipals ciudatz. O trasfondo ye l’enfrontinamiento entre os sectors mas dinamicos d’a sociedat turca y o gubierno islamista, un choque entre dos modelos de futuro ta un d’os países mas complicaus de levant.

Por a suya parte, o primer ministro turco, Recep Tayyip Erdogan, diz que as protestas forman parte d’un ‘plan sistematico’ ta fer mal a la imachen y a economía d’o país, y ha instau a os manifestants a desaloixar o parque Gezi.

Fuent: http://www.vilaweb.cat/noticia/4124209/20130611/policia-torna-carregar-placa-taksim-distambul.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.